2023 чылдың май 20-де Ада-чурттуң Улуг дайынынче тыва эки турачы-танкычыларның Кызылдан үделгезиниң 80 чыл ою болган.
Бо төөгүлүг болуушкунну катап чаартып тургузары (реконструкциязы), ону документалдыг фильм кылдыр үндүрер дугайында эгелекчи саналды Тываның Национал күрүне архиви үндүргеш, Президентиниң грантызының 694 муң рубль деткимчезин ойнап алгаш, “Тыва эки турачыларга тураскаадыг” деп төлевилелди боттандырган.
Хөй кижиниң сонуургалын оттурган улуг төлевилелге ТР-ниң Национал архиви, В.М. Халилов аттыг филармония, В.Көк-оол аттыг Национал хөгжүм-шии театры, Кызылдың уран чүүл колледжи, Тываның Чазааның Т.Дулуш аттыг үрер хөгжүм оркестри, Кызылдың хоочуннар эвилели болгаш маадырлыг танкычыларның салгалдары, шыңгыы кастинг эрткен улус болгаш күзелдиг кижилер киришкен.
1943 чылда И.В.Сталин аттыг Культура бажыңы турган амгы филармонияның даштыкы хевирин ол үеде кандыг турган, шак ынчалдыр кылгаш, шупту киржикчилерге эрги үениң хевин кедиргеш, барымдаалыг фильмге херек материалды май 19-та тырттырган, а май 20-де көрүкчүге төөгүлүг үделгени диригжидип көргүскен.
Солун төлевилелдиң сценарийин В.Көк-оол аттыг Национал театрның литература килдизиниң удуртукчузу Виктория Хомушку бижээн. Көргүзүгнү тургузар ажылды театрның кол режиссеру, Тываның алдарлыг артизи Сайдаш Монгуш, барымдаалыг фильмниң режиссеру Виталий Петров болгаш ооң тырттырар бөлүү демниг ажылдаан.
Ийи хонук дургузунда реконструкция азы төөгүлүг үделгени диригжиткенинге киришкен болгаш ону көрген улустуң, оларның аразында С.Токаның чолаачызы чораан, амгы үеде 90 харлыг хоочуннуң сагыш-сеткилинге чүү хайнып турганының дугайында допчу материалды “Шын” солуннуң дараазында үндүрүлгезинден номчуп болур.
#Тываэкитурачы_танкычыларныңүледгези80чыл #ТываныңНационалархиви #Националхөгжүм_шиитеатры #Халиловаттыгфилармония #ТываныңЧазааныңТимурДулушаттыгүрерхөгжүморкестри #Кызылдыңхоочуннарэвилели
