Июнь 5-те ТР-ниң Дээди Хуралының тоску сессиязының ээлчеглиг хуралы болуп эрткен. Ниитизи-биле 47 айтырыгны чугаалажып көрген, республиканың хоойлуларынга киирген 14 өскерилгени депутаттар деткээн. “Тыва Республиканың 2023 чылда бюджединиң күүселдезиниң дугайында” хоойлуну хүлээп алган.
Бо хурал ТР-ниң Дээди Хуралының чүгле тоску сессияның эвес, а республиканың парламентизиниң үшкү чыыжының сөөлгү түңнел хуралы. Ооң-биле холбаштыр “Тыва Республиканың Дээди Хуралының (парламентизиниң) дөрткү чыыжының депутаттарының соңгулдаларын эрттирер дугайында” доктаалды хүлээп алган. Ол соңгулдалар 2024 чылдың сентябрь 8-те болуп эртер.
Хуралдың төнчүзүнде ТР-ниң парламентизиниң Даргазы Каң-оол Даваа Дээди Хуралдың үшкү чыыжының ажыл-чорудулгазының түңнелдериниң дугайында илеткээн. Дээди Хуралдың үшкү чыыжының ажылы Россия Федерациязының болгаш Тыва Республиканың күрүне политиказын боттандырарынче, регионнуң социал-экономиктиг болгаш культурлуг хөгжүлдезин хоойлужудулга-биле магадылаарынче угланганын Каң-оол Даваа демдеглээн.
Регионнуң парламентизи-биле чогумчалыг кады ажылдажылгазы дээш Тываның Баштыңы Владислав Ховалыгга, ТР-ниң Чазаанга депутаттарның мурнундан өөрүп четтиргенин Каң-оол Даваа илереткен.
Дээди Хуралдың үшкү чыыжының депутаттарының кылып чоруткан ажылы дээш оларга өөрүп четтиргенин Тываның парламентизиниң Чөвүлелиниң кежигүннериниң мурнундан Каң-оол Даваа илереткен.
Тыва Республиканың Дээди Хуралының (парламентизиниң) дөрткү чыыжының депутаттарының 2024 чылдың сентябрь 8-те болуп эртер соңгулдаларның соонда тус черниң парламентизиниң чаа составы ажылын эгелээр.
Ш. МОҢГУШ белеткээн.
Чуруктарны интернет четкизинден алган.
«Шын» №42 2024 чылдың июнь 8
![](https://sun4-19.userapi.com/impg/5fNGe7b4P4ZIV2p0Nadjkh819dUy2dghy8FswQ/bayq1b8Uv48.jpg?size=1024x683&quality=95&sign=a995b6b7ff5e7c9a49658f4b971fde50&c_uniq_tag=2Tl3nWlwWc0P3LPBvUO-tTLnjk3int6sWn6olFtuPcY&type=album)
![](https://sun4-19.userapi.com/impg/wfKFyuw8YdR_6oRg0sJ5j4x34ha-GSU94m9cpw/sasZpJDt9qQ.jpg?size=1024x683&quality=95&sign=e880b400453f494aadca18017a178768&c_uniq_tag=zyVrha8HuuFqzDaVtTdn28iowGO9Bn6NBt8JwbDtWpM&type=album)
![](https://sun4-21.userapi.com/impg/sp5_dhwoXzfVbf6nKhMK-5C9Uy1zmDguQLIZMg/g2RJyKjDPRI.jpg?size=1024x683&quality=95&sign=af1e04c04a943544695e0fcb0a38bb6d&c_uniq_tag=Bld8kPpGe5KitoAI-nqih2QqOo4FkBQFeA9-tc1Du38&type=album)
![](https://sun4-20.userapi.com/impg/72caJVGqV9g7m2nLykpqeoU4cnbiPSnkgh0L1A/ayCehWT8P0Y.jpg?size=1024x683&quality=95&sign=0013ce86ba2e4c5164059a98ba0922ec&c_uniq_tag=gAKztKyOUXOjzbLyAIRWK_TKOgaSoDhd62mC7Q7SX30&type=album)
![](https://sun4-22.userapi.com/impg/Que4INo5ROW-ojmfb3oxNbRYSmrN2G9YebsL5Q/j7EOJqTma4U.jpg?size=1024x683&quality=95&sign=1d3d5e5b8b7fe93ba65b10a5b6c72645&c_uniq_tag=5ZNk7jE9H-JkCLdGJWqQy8YUrO4he7SfYaoYCBNvOU0&type=album)
![](https://sun4-22.userapi.com/impg/yZxumIWD4WbGh8FoOSfib2NUWoO-QnqoH90yzQ/TKc0ltVlbHk.jpg?size=1024x683&quality=95&sign=ab9bef00f66da09638e931c6b2063847&c_uniq_tag=nl54J98bTjlfSeRbMaIzAwFIcIhVpUqw7ziFiePdXsU&type=album)