Кызыл хоорайның чылыг-энергетика төвүнүң ажылын август 18–28 хүннеринде түр када бүрүнү-биле соксадыр. 10 хонуктуң дургузунда чылыг-энергетика төвүнүң дериг-херекселин кышка белеткээри-биле септелге ажылдарын чорудар. Хоорайның изиг суг-биле хандырылгазын түр када соксадырының айтырыгларын болгаш хуусаазын Кызылдың администрациязы-биле дугурушкан, чогуур информацияны хоорайның башкарыкчы компанияларынче чоруткан.
Кызыл хоорайның чылыг-энергетика төвүнүң ажылын түр када бүрүнү-биле соксадыры – кышкы одалга сезонунга белеткел үезинде чылдың-на албан чорудар хемчег.
10 хонук дургузунда одалга суугуларының болгаш турбина дериг-херекселдериниң байдалының хыналдазын энергетиктер хынамчалыг чорудуп, суугуларның болгаш турбинаның суг дамчыдар иштики хоолайларын, быжыглал арматураны болгаш изигден камгалал изоляциязын солуур, оларның кончуг изиг температурага үрелиишкин чок ажылдап шыдаарын шенээр. Кызыл хоорайның чылыг-энергетика төвүнүң дузалал дериг-херекселдериниң техниктиг байдалын хынааш, үрелиишкиннер билдинер азы чаартыр чүүлдер бар болза, оларны септээр болгаш солуур.
2025 чылда 1 492 метр узун дурттуг чылыг четкизин туткан. Кызыл хоорайның чылыг-энергетика төвүнүң ажылын түр када соксаткан үеде 1 550 метр узун дурттуг хоолайларны солуур. Бо хүннерде байдал-биле алырга, ниити хемчээли 800 метр узун дурттуг участоктарда эргижирээн хоолайларны чаа хоолайлар-биле солаан.
“Чылыг-энергетика төвүнүң ажылын түр када соксаткан үеде чорудар ажылдарның графигин тургускан. Септелге ажылдарын чорудар участоктарга ажылдарны хары угда чорудар. Аңаа бедик мергежилдиг септекчилерниң сес бригадазын хаара тудар. Септелгеге херек материалдарны шуптузун баш бурунгаар белеткээн” – деп, Кызылдың чылыг-энергетика төвүнүң кол инженери Сергей Афанасьев дыңнаткан.
Кызылдың чылыг-энергетика төвүнүң медээлери.
“Шын” №31 2025 чылдың август 14