Кызылдың 5 дугаар школа-гимназиязынга март 22-де чаңчылчаан шүлүк мөөрейи эрткен. Бо чылын 25 дугаар мөөрей болганы ол. Ону чогаадып тургускан болгаш чыл санында-ла удуртуп эрттирип турар организакчызы – Тываның улустуң башкызы Ефросинья Ондар. Ук мөөрейни бо удаада Тываның улустуң чогаалчызы М.Б. Кенин-Лопсаңның чүс харлаан юбилейинге тураскаадып эрттирген.
Хоорайның аңгы-аңгы школаларындан чээрби ажыг 8–11 класстарының өөреникчилери уран номчулгага мөөрейлешкен. Чогаалга ынактарның аразындан Кызылдың 1 дугаар школазының 10-гу классчызы Адиан Күжүгет тиилекчи болуп үнген. 2-ги черни 5 дугаар школа-гимназияның 8-ки классчызы Саира Хертек алган. 3-кү черни ийи өөреникчи ээлээн: 12 дугаар школаның 9-ку классчызы Оюна Донгак биле 17 дугаар школаның 8-ки классчызы Нелли Шактар. Чеди өөреникчи аңгы-аңгы номинацияларның шаңналынга төлептиг болган. Мөөрейниң деткикчилери — организакчы башкы Е.Б. Ондарның 1995 чылда доозукчулары болган.
Мөөрейниң тиилекчилерин шаңнап тура, жюри даргазы Тываның улустуң артизи Виктор Наксыл ажыктыг арга-сүмени уругларга берген. Мындыг уран номчулга мөөрейлери төрээн тыва дылывысты келир үениң салгалдарынга камгалап арттырарының, төрээн чогаалга ынак болурунуң идегелдиг чепсээ ол.
Мөөрей эгелээриниң мурнунда аалчылар — башкылар, өөреникчилер, чогаалчылар 5 дугаар школада музейже экскурсиялааш, М.Б. Кенин-Лопсанга тураскааткан экспонаттарны болгаш ооң чогаал ажылы-биле таныжып, РФ-тиң өөредилгезиниң хүндүлүг ажылдакчызы С.К. Монгуштуң солун тайылбырлыг лекциязын кичээнгейлиг дыңнааннар.
Светлана БАЛЧЫР, мөөрейниң жюри кежигүнү.
Чуруктарда: тиилекчи Адиан Күжүгет башкызы А.К. Ондар-биле (солагай талазында); жюри кежигүнү Тываның улустуң чогаалчызы Мария Күжүгетке төрүттүнген хүнү-биле мөөрейниң тургузукчузу Е.Б. Ондар боодал чечектерни сөңнеп тур;
Ай-кыс Допсанның тырттырган чуруктары.
«Шын» №11 2025 чылдың март 27
