Июль 11-де Тыва Республиканың Дээди Хуралынга тускай шериг операциязынга киржип тургаш, маадырлыы-биле мөчээн шериглерге дайынчы хөделиишкиннер үезинде эрес-дидим чоруун көргүскени дээш Россия Федерациязының Президентизиниң Чарлыы-биле «Эрес-дидим чоруу дээш» деп орденнерни маадырларның чоок кижилеринге тывыскан.
Хемчегге ТР-ниң Дээди Хуралының депутады Эрес Хуурак, тускай шериг операциязының талазы-биле бүрүн эргелиг төлээзи, ТР-ниң Дээди Хуралының Даргазының оралакчызы Маадыр Успун, ТР-ниң шериг комиссары Демир-оол Артына, 55-ки гвардейжи мото-адыгжы (даг) бригадазының командириниң шериг-политиктиг ажыл-чорудулга талазы-биле оралакчызының хүлээлгезин түр үеде күүседип турар Бадый Моңгуш, «Ада-чурт камгалакчылары» күрүне фондузунуң регионалдыг салбырының даргазының оралакчызы Эртине Кара-Сал болгаш ТР-ниң Дээди Хуралының депутаттары киришкен.
Күрүне шаңналдары тыпсыр бетинде ТР-ниң Дээди Хуралының Даргазы Каң-оол Даваа сөс алгаш, маадырларның чоок улузунга ТР-ниң Баштыңының болгаш ТР-ниң Дээди Хуралының депутаттарының база Тываның хөй омак-сөөктүг чонунуң өмүнээзинден кажыыдалын илереткен.
«Төрээн черин камгалап тургаш, амы-тынындан чарылган оолдарывыстың чырык адынга сактыышкынны кылып чыглып келдивис. Эрес-дидими-биле амы-тынын харамнанмаан маадырларывыстың чоок кижилеринге чүрээвистиң ханызындан кажыыдалывысты болгаш сагыш човаашкынывысты илередип тур бис. Бистиң маадырларывыс бисти дээш, улуг Россияның келир үези дээш, эң-не эргим үнелиг чүүлүн – амы-тынын өргээннер. Тывавыстың төлептиг оолдарының шериг хүлээлгезин маадырлыы-биле күүсеткени Россияның болгаш ооң хөй омак-сөөктүг чоннарынга кезээде сактыышкын болуп артар!» – деп, ол чугаалаан.
Россия Федерациязының Президентизиниң «Эрес-дидим чоруу дээш» деп ордени-биле дараазында маадырларны шаңнаан. Орденнерни маадырларның чоок кижилеринге дамчыткан.
Часпас адыгжы Кежик Суванның орденин авазы Зоя Суванга, чолаачы-адыгжы Чойган Салчактың орденин өөнүң ишти Шеңне Салчакка, биче сержант, салбыр командири Сылдыс Саттың орденин ооң акызы Антон Сатка, биче сержант, адыгжы Орлан Доржукайның орденин өөнүң ишти Сюзанна Доржукайга, адыгжы Найыр Чагар-оолдуң шаңналын авазы Аялга Чоодуга, сержант Шаанак Иргиттиң орденин авазы Уран Иргитке дамчыткан.
ТР-ниң Дээди Хуралының депутады Аяна Моңгуш:
– Бөгүн орден алган маадырларывысты шуптузун таныыр-дыр мен. Бир орден алган маадырывыс Орлан Доржукайны бичиизинден тура-ла билир мен. Оларның кырган-ачазы база Ада-чурттуң Улуг дайынының киржикчизи чораан. База ол-ла Украинага тулчуп турган. Маадырларның чоок кижилериниң кажыыдалын үлежип тур мен. Хомуданчыг-дыр. Ынчалза-даа «Төрээн чуртту камгалаары деп мергежил бар» дээр болгай. Маадырларга алдар!
Айдың ОНДАР.
Чуруктарны ТР-ниң Дээди Хуралының парлалга албанындан алган.
"Шын" №52 2024 чылдың июль 13
