Төрээн дыл башкыларының тергиини кым болурул

«Төрээн дыл болгаш чогаалдың тергиин башкызы – 2023» профессионал мергежил мөөрейиниң регионалдыг чадазы Кызылдың Ч.Н. Хомушку аттыг 16 дугаар лицейинде болуп турар. Мөөрей республикада бир дугаар эртип турар.

Россияның Чырыдыышкын яамызының эгелээшкини-биле Бүгү-российжи төрээн дылдар башкыларының мөөрейи 2022 чылда эгелээн. Ооң федералдыг деңнелде кол оператору – РФ-тиң чоннарның төрээн дылдарының федералдыг институду, а регионалдыг деңнелде – Национал школа хөгжүдер институт. Тывада мөөрейниң кол организакчызы – Өөредилге яамызы. Мөөрейниң кол сорулгазы – төрээн дылдар болгаш чогаал башкылаашкынынга чаа-чаа арга-дуржулганы тодарадып, нептередири база башкыларын деткип, шаңнап-мактаары.

Мөөрейниң дүрүмү ёзугаар киржикчи башкылар орус дылдыг уругларга тыва дылды өөредириниң кичээлдеринге болгаш мастер-класстарынга боттарының методиктиг аргаларын орус дыл кырынга мөөрейге шылгаар.

Мөөрейде ниитизи-биле 10 тыва дыл башкылары база уруглар садтарының 9 кижизидикчи башкылары киржип турар.
Тыва национал школа хөгжүдер институттуң директору, дыл эртемнериниң кандидады, мөөрейниң шииткекчилериниң даргазы Елена Кууларның чугаалап турары-биле алырга, тыва дылды орус дыл кырынга тайылбырлаарының методиказынга болгаш терминнер-биле ажылдаарынга киржикчилер бергедээшкиннерге таваржып турар. Республиканың тыва дыл башкылары тыва дыл болгаш төрээн чогаал кичээлдерин уругларга чүгле тыва дыл кырынга өөредип турар болгай. Чижээ, өк-биле адаар ажык үннер дугайында теманы орус дыл кырынга тайылбырлаары, өк-биле адап турар ажык үжүктерниң үн аппарадынга ажылының дугайында чедингир тайылбырны чедип алыры белен эвес дээрзин ол чугаалаан. Тыва дылдың кайы-ла-бир темазын Россия мөөрейинге орус азы өске омактыг уругларга билдингири-биле чедирери – тиилекчиниң кол сорулгазы.

Бо чылдың февраль айда РФ-тиң Чырыдыышкын сайыды Сергей Кравцов мөөрейниң регионалдыг чадазын ажыдып тура, “Школа назы четпээн уругларның төрээн дылынга чугаазын сайзырадыр эң тергиин практика” деп чаа номинацияны немей чарлаан.
Республика чергелиг мөөрейниң тиилекчизи сентябрь 18-тен 25-ке чедир Карачаево-Черкессияга болуп эртер Россия чергелиг мөөрейге Тываны төлээлеп киржир.

/ Алиса ДОНГАК.
Чуруктарны интернет четкизинден алган.

"Шын" №30 2023 чылдың апрель 26