Бөгүн, апрель 24-те, “Тергиин төрээн дыл болгаш чогаал башкызы - 2023” мөөрейниң регионалдыг чадазының байырлыг ажыдыышкыны Кызыл хоорайның 9 дугаар гимназиязынга болуп эрткен. Ук мөөрей республикада бир дугаар болуп эртип турар. А бүгү-российжи чадага Тываның башкылары боттарының тергиин арга-дуржулгазы-биле үлежип 2 дугаар чыл киржип турары бо. Төрээн дылдар болгаш чогаал башкылаашкынынга чаа-чаа арга-дуржулганы тодарадып, нептередири болгаш төрээн дылдар болгаш чогаал башкыларын деткип, шаңнап-мактаары мөөрейниң кол сорулгазы болур. Россия Федерациязының чырыдыышкын яамызы мөөрейни тургускан. Ооң федералдыг деңнелде оператору “РФ-тиң чоннарның төрээн дылдарының федералдыг институду”, а регионалдыг деңнелде “Национал школа хөгжүдер институт” болур. А Тывада ук мөөрейни республиканың Өөредилге яамызы организастап эрттирип турар.
Ук мөөрей чаа эгелеп турар-даа болза, ол тускай дүрүмнерлиг. Мөөрей киржикчилери боттарын таныштырары-биле “Медиавизитка” деп хемчегге ырактан киришкеннер. Дараазында 3 хонук дургузунда башкылар боттарының ажылдарын “Методиктиг мастерскаяга” көргүзүп, арга-дуржулгазын кичээл үезинде, класс шактарын, мастер-класстарны эрттирип тура бадыткаар дээрзин мөөрейниң организаторлары дыңнаткан.
Бо чылдың февраль айда РФ-тиң чырыдыышкын сайыды Сергей Кравцов мөөрейниң регионалдыг чадазын ажыдып тура, “Школа назыны четпээн уругларның төрээн дылынга чугаазын сайзырадыр эң тергиин практика” деп чаа номинацияны немей чарлаан. Ынчангаш ук мөөрейде уруглар садтарының кижизидикчи башкылары база киржип чедип келгеннер.
Республика чергелиг мөөрейниң тиилекчизи сентябрь 18-тен 25-ке чедир Карачаево-Черкессияга болуп эртер Россия чергелиг мөөрейге Тываны төлээлеп киржир.
Ниитизи-биле республиканың кожууннарының болгаш найысылал Кызылдың школаларындан, уруглар садтарындан 20 башкы киржип чоруп турар. Мөөрей Кызылдың 9 дугаар гимназиязынга,17 дугаар уруглар садынга болгаш 16 дугаар лицейге болуп эртер.
Чыжыргана СААЯ
Чуруктарны Национал школа хөгжүдер институттан алган.
