Тываның күш-культура болгаш спорт талазы-биле күрүнениң болгаш муниципалдыг албан черлери тускай шериг операциязының киржикчилеринге болгаш оларның өг-бүлелериниң кежигүннеринге ачы-дуза чедирилгезин халас чорудар. Тываның Чазаа Дээди Хуралче «Тускай шериг операциязының киржикчилеринге болгаш оларның өг-бүлелерин деткииринге немелде социал магадылалдар дугайында» деп регион хоойлузунче киирер өскерилгелерни болгаш немелделерни ажылдап кылгаш, бадылаары-биле төлевилелин киирген.
Бо хүннерге чедир спорт албан черлеринче тускай шериг операциязының киржикчилери болгаш оларның өг-бүлелериниң кежигүннери 50 хуу чиигелделиг барып турар. «Бүгү чүүлдү Тиилелгеже!» деп республика комиссиязы күш-культура, спорт албан черлериниң күш-дамыр сайзырадыр тренажерларын болгаш өске-даа ачы-дузаны ТШО киржикчилери болгаш оларның өг-бүлелериниң кежигүннери халас ажыглаар деп шиитпирни кылган. Чиигелделер ТШО киржикчизиниң өөнүң ишти/ээзи болгаш ажы-төлүнге база көрдүнген. Ынчангаш олар Тываның девискээринде күш-культура болгаш спорт албан черлериниң төлевирлиг ачы-дузазын халас ажыглаар эргелиг болур.
Тыва Республиканың эрге-чагыргазы ТШО киржикчилери болгаш оларның өг-бүлелерин деткиир талазы-биле ажылды үргүлчү чорудуп, көргүзер деткимчениң даңзызын чаартып, немеп кел чыдар. Ооң-биле чергелештир улуг кичээнгейни оларның кадыкшылын быжыктырарынче, балыгланган соонда, эмненип алырынче болгаш тайбың амыдыралче катап эглип кээп, бодун ниитилел кежигүнү кылдыр алдынарынга дузалаарынче угландырган.
Медээни болгаш чурукту ТР-ниң Чазааның парлалга албанындан алган.
“Шын” №34 2025 чылдың сентябрь 4