«Тываның маадырлары» регионалдыг кадр төлевилелиниң киржикчизи Эртине Кара-Сал Тыва Республиканың Чазааның Даргазының социал политика, кадык камгалал, культура айтырыгларын харыылап турар оралакчызы Орлан Сарыгларның дагдынылгазында эрткен стажировказының түңнелдерин үндүрген.
Чазак Даргазының оралакчызының чугаазы-биле алырга, төлевилелдиң киржикчилери Тываның күрүне университединиң баазазынга өөредилге программазы езугаар өөредилгезин болгаш практиказын уламчылап турар.
«Ээлчеглиг өөредилге модулюн шиңгээткен соонда, «дайынчы үженнер» база бир стажировказын эрткеш, программаның төнчү чадазы — доозукчунуң шылгалда ажылдарын камгалаар. Бодумнуң дагдынылгамда Эртине Кара-Сал-биле тускай шериг операциязының киржикчилеринге Тывага адаптивтиг спорттуң хөгжүлдезинге тураскааткан сөөлгү төлевилелиниң утказын тодаргай сайгарып чугаалаштывыс. Бо төлевилел херек кырында ажыглаттынып, бистиң дайынчыларывысты деткиириниң системазын сайзырадырынга үлүг-хуузун кииреринге бүзүрээр» - деп, Орлан Сарыглар демдеглээн.
Амгы үеде Эртине Кара-Сал «Ада-чурт камгалакчылары» күрүне фондузунуң регионалдыг салбырының удуртукчузунуң оралакчызының хүлээлгезин күүседип турар. Ооң ажылы тускай шериг операциязының хоочуннарын деткиир, оларның социал адаптациязын болгаш хамааты амыдыралче киржилгезин хандырар айтырыглар-биле холбаалыг.
Регионнуң спортчу федерациялары-биле кады тускай шериг операциязының хоочуннар ортузунга адаптивтиг спортту сайзырадыр талазы-биле ажылды чорудуп турар. Оларның аразында Күш-шыдал спорту, кадыкшылы кызыгаарлыг кижилерге олуруп алгаш волейболдаары, сноуборд, даг хаагының спорту, следж-хөккей, ча адары дээш оон-даа өске хевирлер бо угланыышкында.
«Ада-чурт камгалакчылары» фондунуң регионалдыг салбырының хайгааралында кижилер аңгы-аңгы деңнелдиг спортчу маргылдааларга доктаамал киржип турар. Чижээ, дайынчы хөделиишкиннер хоочуннары болгаш кадыкшылы кызыгаарлыг кижилер аразынга олуруп алгаш ойнаар волейбол маргылдаазы, ол ышкаш тускай шериг операциязының хоочуннары инвалидтер аразынга күш-шыдал спортчу маргылдаалары республикага бир дугаар болуп эрткен. Тываның төлээлери спорттуң кышкы хевирлеринге бирги бүгү-россия чергелиг «Ада-чурт камгалакчыларының кубогунга», Кузбасска Сибирь чоннарының бир дугаар чайгы спартакиадазынга, Казань хоорайга тускай шериг операциязының хоочуннар аразынга «Абилимпикс» профессионал мергежилдиң бирги чемпионадынга, Алтай Республикага олуруп алгаш ойнаар волейболга регионнар аразының маргылдаазынга шаңналдыг черлерни ээлээннер.
Фонд салбырының төлээлериниң чугаазы-биле алырга, ындыг хемчеглерни эрттирери адаптивтиг спорттуң хөгжүлдезинге идигни берип, тускай шериг операцияларының киржикчилеринге социал реабилитацияның аргаларын калбартыр.
ТР-ниң Чазааның парлалга албаны.