Май 5-те Федералдыг үндүрүг албанының Тыва Республикада эргелелиниң ажылдакчылары тускай шериг операциязының киржикчилеринге ээлчеглиг ачы-дузазын чедирген.
– Бо удаада тускай шериг операциязында киржип турар дайынчыларга чугула херек дериг-херекселди садып алырынга Ниити-российжи улусчу фронтунуң Тывада салбырынче 170 муң рубльди дамчыттывыс.
Кызылда 55-ки тускай мото-адыгжы (даг) бригаданың дайынчылары ук акша-хөреңги-биле чугула херек дериг-херексел болгаш эки шынарлыг майгыннарны боттары шилип ап, садып алдылар – деп, Федералдыг үндүрүг албанының Тыва Республикада эргелелиниң удуртукчузунуң оралакчызы Шончалай Конзай-оол чугаалаан.
Бо чылдың эгезинден тура үндүрүг албанының ажылдакчылары ниитизи-биле 556 муң рубльге ачы-дузаны чедирген.
Дайынчыларның чагыын езугаар “Автопоезд” деп акция-биле дайынчы хөделиишкиннер девискээринде киржип турар шериглеривисче чоруткан автомашиналарны септээринге херек дериг-херекселдерни болгаш белен өтпес майгыннарны шөлээлеп келген дайынчыларга хүлээткени бо. Олар эртен чоруптарлар.
Оон аңгыда интернет-садыг таварыштыр дураннар, бел кезээнге шарып алыр частыышкын бузундуларынга удур камгалал дериг дээш өске-даа херек чүүлдерни чагытканын Улусчу фронтунуң идепкейжизи Ариана Салчак дыңнаткан.
– Интернет-садыг таварыштыр чагыткан чүүлдер дорт Севастополь хоорайда эки турачыларга чедер. Олар Запорожье областа 11 биле 19 дугаар бригадаларда бистиң шериглерге чедирип бээр.
“Автопоезд” акциязы-биле дайынчы хөделиишкиннер девискээринде киржип турар шериглеривисче орук чок черлерни эртип шыдаар, тускай чепсеглеттинген 40 автомашинага немей бир “демир аътты” Кызылдың Төлээлекчилер хуралы болгаш азербайджан диаспора Москва хоорайдан саткаш, чоруткан. Амгы үеде техника Донда Ростов хоорайда чеде берген. Демир-орук станциязының поезд турар черинден автомашиналарны дүжүргеш, иштин дерип, дамчыдарынга белеткеп турар. Тиилелге хүнүнүң бүдүүзүнде, май сесте, бистиң дайынчыларывыска ону хүлээдип бээр.
Федералдыг үндүрүг албанының Тыва Республикада эргелелиниң ажылдакчылары тускай шериг операциязы эгелээнинден тура доктаамал ачы-дуза деткимчезин көргүзүп турар – деп, Ариана Салчак чугаалаан.
Кызылда 55-ки тускай мото-адыгжы (даг) бригаданың материал-техниктиг хандырылгазының төлээлери тускай шериг операциязында киржип турар дыйынчылар колдуунда улуг автомашиналарда чоруп турар болгаш техника септээринге херексел чугула херек болуп турарын дыңнаткан.
– Дайынчы хөделиишкиннер девискээринге машина септээр херекселдерни тывары дыка берге. Доктаамал шимчээшкинде, көжүп чоруур болгаш, белен өтпес майгыннар база чугула херек. Чамдык черлерге, арга-арыгга, элээн турар апаар. Чаъстап эгелээрге, чедилик чеде бээр – деп, олар чугаалаан.
Ачы-дуза көргүскен Федералдыг үндүрүг албанының Тыва Республикада эргелелинге болгаш Ниити-российжи улусчу фронтунуң Тывада салбырынга шериг албан-хүлээлгелиглерниң мурнундан олар четтиргенин илереткен.
#Ниити_российжиулусчуфронт #Федералдыгүндүрүгалбаныныңтывадаэргелели #55китускаймото_адыгжыбригада #Тускайшеригоперациязы #ТМГМедээлер #Тыва #Тывамедээ #Тывадыл #Тывамедиагрупп #Тува
#новоститывы #новостикызыл #кызыл #тувамедиагрупп #Тува #Тыва #Tuva #TMG #TMGNEWS #Tuvanews
