2023 чылда «Тыва Республиканың муниципалдыг тургузугларының аразында девискээрлериниң шөлдерин чаагайжыдары болгаш арыг-силигни хандырар талазы-биле ажыл-чорудулганы эң эки организастаар» дугайында мөөрейни Тываның Чазаа чарлаан турган. Ол мөөрейге Таңды кожууннуң чурттакчылары, кожууннуң, сумуларның удуртулгалары демнежип алгаш, идепкейлиг киришкеннер. Чазак Даргазының мөөрей болур доктаалы үнүп кээрге, ынчангы кожуун даргазы турган А.К. Монгуш, оралакчызы Э.С. Сатты ол мөөрейге белеткээр ажылды удуртур харыысалганы дааскан. Ук мөөрейге киржири-биле федералдыг, регионалдыг национал төлевилел ёзугаар чаагайжыдылга планын тургускаш, чогуур материалдарны садып алгаш, суурнуң чону-биле бир демниг киришкеннер.
2023 чылда мөөрейниң түңнелинде республиканың сумуларының аразынга «Эң-не чараш суур» номинацияга 1-ги черни (500 муң рубль түңнүг акша шаңналын) Таңды кожууннуң Кочетов сумузу алган.
«Эң-не эки ажаалдалыг муниципалдыг» 1-ги чергениң диплому биле шаңнал тракторну Таңды кожууннуң чагыргазынга тывыскан.
Чоннуң байдалын экижидеринче идепкейлиг ажылы дээш Таңды кожууннуң чагыргазын 2024 чылда шаңнаан.
Бо чылын Тыва Республиканың чуртталга-коммунал ажыл-агый бүдүрүлгезиниң 80 харлаан байырлалы Улусчу чогаадылга бажыңынга болуп эрткен. Тываның Баштыңы Владислав Ховалыг хоочуннарга, адырның удуртукчуларынга байырны чедирип, регионнуң чуртталга-коммунал ажыл-агый адырының тургустунарынга болгаш хөгжүлдезинге хөй чылдарда үре-түңнелдиг, ак сеткилдиг ажылдаан ажылчыннарга күрүнениң болгаш яамыларның шаңналдарын тывыскан. Чуртталга-коммунал ажыл-агый адырында хөй чылдарда ак сеткилдиг ажылдап келгени дээш, Тываның Баштыңының Өөрүп четтириишкин бижии-биле «Бай-Хаак Тепло» КХН-ниң кол бухгалтери Елена Михайловна Астанинаны, Хүндүлел бижии-билечиңгине директору Владимир Алексеевич Геецти шаңнаан.
Тыва Республиканың Чуртталга-коммунал ажыл-агый яамызының тургустунганындан бээр 80 чыл оюнга тураскааткан хурал үезинде коммуналдыг бокту чыырынга идепкейлиг киржилгези дээш база экологтуг айтырыгларга болгаш чаагайжыдылгага харыысалгалыг хамаарылгазы дээш Межегей сумузунга 2 дакпыр шаңналды тывыскан.
Сумунуң чурттакчы чону бедик угаан-медерелдиин болгаш организастыг чоруун көргүзүп, экологтуг байдалды экижидеринге, девискээрде арыг-силигни тударынга улуг үлүг-хуузун киириштирип турар. Суму чонунуң ажыл-ижинге болгаш идепкейлиг хамааты туружунга төлептиг үнелелин берген бедик шаңналдары дээш Межегей суурнуң суму даргазы О. Мунзукка, баштыңы А. Монгушка болгаш сумузунуң бүгү чурттакчыларынга изиг байырны чедирип тур бис!
Сергей ОЮН, Таңды кожууннуң Төлээлекчилер хуралының депутады.
Авторнуң архивинден алган чурук.
«Шын» №11 2025 чылдың март 27
