Чагытай хөлде дериттинген эштир чер ажыттынганын Таңды кожууннуң чагырга чери дыңнаткан.
Эштир черде солуттунар болгаш суг саартынар кабинкаларны, арыгларын черни, дыштанып олурар черлерни тудуп кылгаш, хемени саткан. Майгын болгаш машина тургузар черлерни база аңгылаан.
Хөлдүң эриинде медицина пунктузун, модульдуг бажыңчыгашты, хөлезилел пунктузун, хайгаарал доскуулун тургускан. Эштип дыштанып келгеннерге чыдар болгаш хөлегеленир херекселдерни тургузуп, девискээрни долгандыр херимнээн.
Объектини «Орук болгш транспорт тудуу» кызыгаарлыг харыысалгалыг ниитилели туткан. «Чагытай хөлде дыштанылганың девискээри» дериттинген эштир черниң ажылдаар чуруму: 9:00 шактан 20:00 шакка чедир.
Эштир черни Россияның Онза байдалдар яамызының Тывада Кол эргелелиниң биче хемчээлдиг хемелер талазы-биле күрүне инспекциязы хынаан, албан езузу-биле ону ажыдар чөпшээрел алдынган.
Тываның социал-экономиктиг хөгжүлдезиниң амы-хууда программазының база «Туризм болгаш хүндүлээчел чорук үлетпүрү» нацтөлевилелдиң ачызында республиканың эштир черлерин чаагайжыдып, автотуристерге дериттирген (майгыннар болгаш чычааннар тургузар) чайгы черлерни тудуп база турисчи хүрээлеңни экижидер аргалыг болган.
Тускайлап дериттинмээн черлерге эштири айыылдыг дээрзин база катап сагындырып каалы.
ТМГ-ниң медээзи.
