2024 чылдың август 15-те Кызылда Алдан-Маадыр аттыг Национал музейге Тыва Арат Республиканың ССРЭ-ниң хүрээлеңинге бактаап киргениниң 80 чыл оюнга тураскааткан окрыткаларга таңма басканының ёзулалы болуп эрткен.
Ук төөгүлүг болууушкунга тускай парлап үндүрген открыткаларга баштайгы угулза-каасталгалыг таңманы Чазактың оралакчы даргазы Орлан Сарыглар, Национал музейниң директору Каадыр-оол Бичелдей болгаш Россияның Почта харылзаазының Тыва Республикада эргелелиниң директору Владимир Ревенко олар басканнар.
«Бо онзагай хүнде бистиң өглеривистиң өнчүледип арттырып кааны төөгүлүг, ыдык сагыызыннарынга күдүк базып, мөгейип турар бис. Тыва Арат Республиканың төөгүзүнүң эң-не сорунзалыг, алдар-аттыг арыннарының бирээзи болза, почта маркалары болгаш открыткалар болур. Олар бот-тускайлаң хевир-бүдүжү-биле бүгү делегейниң улузунуң аныяк күрүнеге сонуургалын оттуруп чораан. Россияның Почтазын, ооң тус черде эргелелин Тыва Арат Республиканың ССРЭ-ниң хүрээлеңинге бактаап киргениниң 80 чылдаанынга тураскааткан тускай окрыткаларга база чагаа хаптарынга таңма базарының ёзулалын боттандырганы дээш өөрүп четтириишкинивисти илергейлеп тур мен» — деп, Орлан Сарыглар чугаалаан.
Россияның Почта харылзаазының Тыва Республикада эргелелиниң директору ындыг чүүл республикада чаагай чаңчыл апарган деп чугаалаан. «Уран чурулгалыг почта таңмазы бөдүүн чагаа хавын азы почта открытказын улам өңгүр, солун болгаш тускайлаң болдурар. Оларга албан-на таңма базар ёзулал бистиң республикада нептереңгейжип, чугула болуушкун апар чыдары өөрүнчүг. Тускай таңма баскан открыткалар болгаш чагаа хаптары филателистерниң коллекцияларының каасталгазы болуп, Тываның аалчыларынга, төрээн чериниң төөгүзүнүң үнелекчилеринге тулган суй белек болур» — деп, Владимир Ревенко демдеглээн.
Россияның Почтазының чагыы-биле кылган таңмада «Россияның хүрээлеңинде Тыва 80 чыл» деп юбилейлиг ай-хүннүң албан ёзулуг сүлде демдээн, таңма баскан черин, ай-хүнүн, чылын айыткан. Открыткаларга каасталга кылдыр Национал музейниң шыгжамырларындан чуруктарны шилип алган.
«ТАР-ның маркаларының коллекциязы филателистерниң делегейинде кончуг үнелиг дээрзин билир бис. Бөгүн саарылгаже төөгүлүг болуушкунну — республиканың улуг чурттуң хүрээлеңинче бактаап киргенин көргүскен тематиктиг открыткалар кирген. Баштайгы майыкта Василий Фадеевич Деминниң «Угуулганың сайгарылгазы» деп чуруу кирген, а ийигизинде «Салчак Калбакхөрекович Тока Тываның ССРЭ-ниң хүрээлеңинге бактаап кирер дээн күзелиниң дугайында угуулганы номчуп турар ССРЭ-ниң Дээди Совединиң Президиумунуң хуралы». Бо болза республиканың амыдыралынга төөгү уткалыг улуг болуушкун болур. Ону федералдыг деңнелге Россияның Почтазы албан ёзузу-биле бүрүткээн» — деп, болуушкуннуң ужур-уткалыын Каадыр-оол Бичелдей айыткан.
"Шын" №62 2024 чылдың август 17
