Тускай шериг операциязынга киржип чораан хамаатылар социал керээ күрүне программазының деткимчези-биле бодунуң хууда ажыл-агыйын ажыдып ап эгелээн.
Ук программа 2025 чылдан эгелээш, РФ-тиң Президентизи Владимир Путинниң эгелээшкини-биле «Өг-бүле» деп национал төлевилелдиң деткимчези-биле боттанып эгелээн.
Тываның Баштыңы Владислав Ховалыгның даалгазы-биле ТР-ниң Күш-ажыл болгаш социал политика яамызы «Ада-чурт камгалакчылары» күрүне фондузунуң регионалдыг салбыры-биле кады ТШО-нуң хоочуннарынга социал керээ күрүне программазынга киржиринге деткимчени көргүзүп, дузалажып турар.
Социал керээ күрүне программазының киржикчилерин шилиири-биле, 2025 чылдың февраль 21-де болган комиссия хуралга тускай шериг операциязының 11 хоочуну бизнес-планын камгалап келген. Хемчег «Ада-чурт камгалакчылары» күрүне фондузунуң Тывада салбырынга болуп эрткен. Киржикчилерниң чамдыызы онлайн, а бир чамдыызы офлайн хевирге киришкен. ТР-ниң күш-ажыл болгаш социал политика сайыды Эдуард Санданның удуртканы комиссия 11 киржикчиниң аразындан 10 хамаатының ажылын деткээн.
Оларның үжү Кызыл хоорайга хууда ажыл-херээн ажыдар деп планнап турар. ТШО-нуң хоочуну Сергек Күжүгет Вавилин ээтпээнге ыяш дилдирер пилорама ажыдарын планнап турар. Сергек пилорама ажыдарынга белен. Дериг-херексели база бар. Ыяш кезер дугайында чөпшээрел бижии бар. Күрүнеден деткимчеге алган акшазы-биле ыяш болбаазырадыр станок садары ооң планында көрдүнген.
Айдаан Сендажы база-ла автомашина септээр угланыышкынны шилээн. Ооң чугаалааны-биле алырга, Кызыл хоорайда автомобильдиг хамаатылар көвүдээн. Ынчангаш шак ол ачы-дузаны хереглээр чоннуң саны хүнден хүнче өзүп олурар.
«Күрүне фондузунуң ажылдакчылары ук программага киржирде херек документилерни чыырынга дузалашкаш, меңээ характеристика база бижип берди. Оларның дузазының ачызында ам автомобильдиң фараларын кылайтыр хоюглаар, салон иштин аштап-чуур ачы-дузаны чонумга көргүзүп эгелээр мен» – деп, Айдаан Сендажы чугаалаан.
Кежик Бакук тускай шериг операциязындан келгеш, бодунуң эжиниң техниктиг хыналда пунктузунга ажылдап турган. Аңаа ажылдап тургаш, дыка хөй чүүлдерни билип алгаш, ам машина септээр техниктиг хыналда пунктузун (СТО) боду ажыдып ап турары ол. Кежиктиң СТО-зунга автомашиналарга каңнаашкын (сварка) ажылдарын болгаш диагностика чорудар.
Комиссияны эртип алган хамаатылар күрүнеден 350 000 рубль деткимчени алгаш, хууда ажыл-херээн ажыдар. А комиссия эртпейн барган хамаатыга комиссия бизнес-планын эде көөрүн база кандыг эдилгелер киирип болурун сүмелээн. Бизнес-планын өскертип алгаш, дараазында комиссияны эртер эргелиг.
ТР-ниң Күш-ажыл болгаш социал политика яамызының медеглээни-биле алырга, дараазында комиссия март айда болур. ТШО киржикчилериниң өг-бүлелеринден база чагыгларны манап турар.
ТР-ниң Баштыңы Владислав Ховалыг ТШО киржикчилеринге шак мындыг деткимче дайынчыларның тайбың амыдыралга турумчуп алырынга улуг идиг болур ужурлуг. Ынчангаш ук айтырыгны хыналдага алырын Күш-ажыл болгаш социал политика яамызынга дааскан.
Айдың ОНДАР.
Чурукту интернет четкизинден хоолгалаан.
“Шын” №10 2025 чылдың март 20
