Тываның чурттакчылары май 1 – Частың болгаш Күш-ажылдың байырлалын делгеми-биле байырлап эрттирген.
Бо чылын найысылалга болгаш республиканың кожуун, суурларының күш-ажылчы чону байырлыг чыскаалдарга өске чылдарга деңнээрге, хөй кижи бедик хей-аът көдүрлүүшкүннүг киришкен.
Кызылга байырлыг чыскаалды Тываның Баштыңы Владислав Ховалыгга баштаткан чазак кежигүннери, ТР-ниң Дээди Хуралдың (парламентизиниң) депутаттары, республиканың яамы-ведомстволарының күш-ажылчы коллективтеринден аңгыда хөй-ниити организациялары шупту киришкен. Оларның аразында идик-хеп даарааш, ТШО-же чорудуп турар аваларның “Даараныкчы батальону” чыглып, боттары шериг пөс-биле даараан тыва тоннарын кеткеш, орден-хавыяаларын азынгаш, кончуг демниг Тайбыңны, Күш-ажылды делгередип киришкен.
“Бис, 40 ажыг авалар, “Даараныкчы батальонну” тургузуп, бо байырлыг чыскаалга изиг күзеливис-биле кириштивис. Частың, Күш-ажылдың, Тайбыңның байырлалын уткуштур бүгү чонга чүгле экини күзеп, ТШО-да киржип турар оолдарывыс, дайынчыларывыс онча-менди чанып кээрин, Тайбың делегейге делгереп турзун деп күзээр-дир бис!” – деп, авалар батальонун баштап келген Нелля Чыпсынак ч????????угаалаан.
Өңгүр-чараш байырлыг чыскаалды Арат шөлүнде чыылган чон “Май 1 делгерезин!”, “Күш-ажыл делгерезин!”, “Тайбың делгерезин!” деп адыш часкап уткуп алган.
“Майның бири аңгы-аңгы мергежилдиг кижилерни, салгалдарны, үзел-бодалдарны каттыштырып турар. Ол– бистиң демниг чоруувустуң, тайбың чуртталгаже, Ада-чуртувустуң хөгжүлдезинче чүткүлүвүстүң байырлалы-дыр. Ол ышкаш чуртувусту хөгжүдүп, экономиктиг чаартылгаларның үндезинин тургузуп, социал хөгжүлдениң болгаш сагыш-сеткилдиң, мөзү-шынарның үнезин кадагалап, бодунуң күжү-биле бистиң чуртувусту алдаржыдып чоруур бүгү кижилерге хүндүткелдиң ёзузун көргүзүп турары-дыр.
Улуг Тиилелгениң 80 чыл оюнда онза өөрүп четтириишкин сөстерин бистиң улуг назылыгларывыска, бодунуң маадырлыг күш-ажылы-биле хүннүң-не Тиилелге хүнүн чоокшуладырынга үлүг-хуузун киириштирген тылдың киржикчилеринге чугаалаксадым. Фашизмни базар демиселге Тываның күш-ажылчы чонунуң киирген үлүг-хуузун үнелээри берге. Ол ышкаш бистиң республикавыстың чурттакчыларының деткимчези бо хүнде ТШО-да киржип турар дайынчыларывыска канчаар-даа аажок үнелиг.
Байырлал-биле, чаңгыс чер чурттугларым! Силерге аас-кежикти, келир үеже бүзүрелдиг көрүштү болгаш күзел-сорулгаңарже чедер орууңарга чаа-чаа чайынналчак чедиишкиннерни, а бистиң шуптувуска – Тывага болгаш Россияга – тайбыңны болгаш сайзыралды күзедим!” – деп, Чазак Даргазы Владислав Ховалыг байыр чедирген соонда, ТР-ниң ДХ (парламентизиниң) Даргазы Каң-оол Даваа болгаш өскелер-даа аңаа улашкан.
Байырлалдың албан-ёзулуг кезээ доостурга, Арат шөлүнүң кол сценазындан Частың болгаш Күш-ажылдың хүнүнге тураскааткан концертке сураглыг артистерниң, чогаадыкчы коллективтерниң оюн-тоглаазы чаңгыланып, улам байырланчыг шинчи киирген.
Арат шөлүнге ол хүн чаңчыл ёзугаар тус черниң бараан бүдүрүкчүлериниң, хууда сайгарлыкчыларның, ус-шеверлерниң кылыгларының садыг-делгелгези база болган. Аңаа ортумак тускай өөредилге черлери база идепкейлиг киришкен. Оларның аразында Ак-Довурак хоорайның даг-үлетпүр техникумунуң директору Байлак Күжүгетке баштаткан делегация техникумнуң каңнакчы мергежилинде өөренип турар сургуулдарының болгаш башкыларының демнежип кылган ажылдарын делгеп киришкен.
Ниитизи-биле бо чылгы Май 1-ниң хүнү ёзулуг байырланчыг, эп-сеткилди каттыштырган, Тайбыңны, Күш-ажылды делгереткен чараш байырлал болуп диңмиреп эрткен.
Бистиң корр.
Буян ООРЖАКТЫҢ болгаш авторнуң тырттырган чуруктары.
“Шын” №17 2025 чылдың май 8
