Шээр малды тарып боозадыр технологиялар талазы-биле билиин бедидер курстарга 15 специалист өөренип алган. Хемчегни сентябрь 15-18 хүннеринде Тываның күрүне университединиң көдээ ажыл-агый факультединиң баазазынга болгаш тус черниң малчын одарларынга эрттирген.
Өөредилгени Агроинвест шуулган үезинде Тываның Көдээ ажыл-агый болгаш аъш-чем яамызы биле «Красноярскагроплем» акционерлиг ниитилелдиң аразында дугуржулганы боттандырар сорулга-биле организастаан. Красноярскыдан башкарыкчы эксперттер— көдээ ажыл-агый эртемнериниң кандидады Яков Сагалаков биле Игорь Шадрин ветеринария албанының, кожууннарның көдээ ажыл-агый эргелелдериниң база республиканың хуу ажыл-агыйларының төлээлери-биле арга-дуржулгазын үлешкен.
Өөредилгениң кол сорулгазы — малдың доңурган үрезин ажыглап тургаш, хой болгаш өшкүнү тарып боозадыр техникага өөредири. Бо арга малдың генетиктиг күш-шыдалын экижидер болгаш бүдүрүмчелиин бедидер ажыл-чорудулганы элээн дүргедедир.
Өөредилгениң түңнелинде шупту киржикчилер программаны чедиишкинниг эрткеш, күрүне сертификаттарын алган. Ам олар малды тарып боозадыр талазы-биле квалификастыг операторлар болган.
Оларның профессионал арга-мергежилдиинден болгаш билиинден Тыва Республиканың мал ажыл-агыйының үре-түңнелдиг хөгжүлдези болгаш көдээ ажыл-агый бүдүрүлгелериниң чедиишкини улуг хамааржыр.
ТР-ниң Көдээ ажыл-агый яамызының медээзинден.
Чурукту интернет четкизинден хоолгалаан.
“Шын” №38 2025 чылдың октябрь 2
