Тыва Республикага уругларның чайгы кадыкшылга болгаш дыштанылга объектилерин чаартыр талазы-биле кампания ажылын эгелээн. Россия Федерациязының Чырыдыышкын яамызының конкурузунга чедиишкинниг киришкениниң ачызында Тываның Баштыңы Владислав Ховалыгның деткимчези-биле, республиканың үш лагеринге капитал септелгелерни чорудар.
РФ-тиң Президентизи В.Путинниң бот-идепкейи-биле эгелээн программада уругларның долу дыштанылгазынга болгаш кадыкшылынга чаа тускай инфраструктура болгаш чаартылга көрдүнген. Ук кампания 2030 чылга чедир үргүлчүлээр, ону регионалдыг бюджеттерден кады акшаландырары көрдүнүп турар.
Бо чылын Ак-Довурак хоорайның өөредилге эргелелинге хамааржыр «Таёжный» уруглар лагеринге капиталдыг септелгени эгелээн. Лагерь Барыын-Хемчиктиң Шолбан-Ак деп кайгамчык чараш бойдустуг черинде турар. Септелге ажылдары март айда-ла эгелээн.
Объектини май айда дужаар, уругларның дыштанылгазы үезинде эгелээр кылдыр кол ажылдарны 10-га чедир дооскан турар дээрзин Тываның Баштыңы Владислав Ховалыг бодунуң блогунга бижээн. Септелгениң чорудуун хынаар ажылды күштелдирерин, ооң иштинде ажылчын бөлүк үргүлчү үнүүшкүннерни организастаарын ТР-ниң Өөредилге яамызынга база Ак-Довурак хоорай чагыргазынга дааскан.
«Таёжный» лагеринде септелгелер-биле чергелештир столовая болгаш эмчи пунктузун база чаартып турар. Владислав Ховалыгның чугаазы-биле алырга, чартык ай дургузунда дыка хөй ажыл кылдынган: «Соңгаларын, эжиктерин, крышазын, чадаларын бүрүнү-биле солуп турар. Чылыдылга системаларының болгаш изиг суг-биле хандырылгазының котёлдарын тургузуп турар». Септелгени «Туваасбестстрой» КХН кылып турар.
Тывага келир чылын ийи уруглар лагерин чаартыр дээрзин Владислав Ховалыг дыңнаткан: Тес-Хем кожуунда «Сайлык» биле Улуг-Хемниң «Чодураа». Бо объектилерни база федералдыг конкурска чедиишкинниг киириштиргеш, чаартыр программаже киирген. «Чодураа» лагерьге 60 олуттуг ийи чаа корпус туттунар, а «Сайлыктың» столоваязынга болгаш эмчи пунктузунга капиталдыг септелгени чорудар.
Үш лагерьниң чаартылгазынга федералдыг бюджеттен 60 сая рубльди аңгылаан.
Бистиң корр.
“Шын” №13 2025 чылдың апрель 10