Кызылдың транспорт техникумунга «Электромонтаж», МЭЭП-41 бөлүктеринге шылгалдалар болуп эрткен.
Студентилер өөредилге үезинде алган билиглерин болгаш мергежилдерин көргүзүп, эксперттерниң салдынганы сорулгаларны шиитпирлеп, даалгаларны шуптузун күүсеткен.
Сургуулдар электри херекселдери-биле ажылдарның аңгы-аңгы аргаларын көргүзүп, шенелделерни чедиишкинниг эрткен.
Эксперттер студентилерниң шылгалдазын «эки» деп үнелээн.
ТЫВАНЫ БҮГҮ-РОССИЙЖИ ЧАДАГА ТӨЛЭЭЛЭЭР
Тыва Республиканың школаларының класс башкыларының аразынга IV Бүгү-россияның онлайн мөөрейиниң регионалдыг кезээниң тиилекчилерин байырлыг байдалга шаңнаан. Мөөрейниң тиилекчизи Кызылдың президентиниң кадет училищезиниң класс башкызы Римма Ширап болган.
Тываның республиканың лицей-интернадының класс башкызы, орус дыл болгаш литература башкызы Сюзана Көк-кыс, Кызылдың президентиниң кадет училищезиниң класс башкызы Наталья Макшанова олар шаңналдыг черлерни ээлээн.
Тес-Хем кожууннуң Самагалдайның 2 дугаар төөгү болгаш ниити билиглер башкызы Баира Дошкут, Сүт-Хөл кожууннуң Кара-Чыраа школазының төрээн дыл болгаш литература башкызы Омак Ондар олар мөөрейниң лауреаттары болганнар.
Россия чергелиг мөөрейге үстүнде ады кирген класс башкылары шупту киржип, Тываны төлээлээр.
ДЫШТАНЫР ТӨПТЕР УРУГЛАРНЫ МАНАП ТУР!
Июнь 1-ден эгелеп республиканың муниципалдыг культура одагларынга болгаш Уругларга база элээдилерге немелде өөредилге төптеринге ниитизи-биле 183 дыштанылга төптери ажыттынар.
Ук төптерге 7–17 харга чедир назылыг уруглар чаа-чаа чүүлдерге өөренип, хостуг үезин ажыктыг эрттирер. Уругларның мөзү-шынар кижизидилгезинче, угаан сайзыралынче база кадыкшылынче угланган хемчеглерни төптерниң ажылдакчылары организастаар. Янзы-бүрү экскурсиялар, солун кижилер-биле ужуражылгалар, музейлер, делгелгелер уругларны чайгы дыштанылга үезинде манап турар.
Уругларның чайгы дыштанылгазын болгаш кадыкшыдылгазын организастаар айтырыгларга хамаарыштыр “изиг шугум” ажылдап турар: +7(29422)2-72-92.
Бистиң корр.
"Шын" №39 2023 чылдың май 31
