Бо чылын «Мээӊ-биле кады күзелдерни бодап ал» төлевилелдиӊ “Күзелдер шивизи” деп Бүгү-российжи акция Тывага декабрь 16-да эгелээн.
ТР-ниң Баштыңы Владислав Ховалыг акцияның байырлыг ажыдыышкынынга киришкеш, 5 харлыг Давааның, 9 харлыг Элеонораның болгаш 6 харлыг Тэнзинниң күзелдерин бүдүрер болганын сагындыраал.
Декабрь 25-те ТР-ниң Баштыңы Владислав Ховалыг Шагаан-Арыгның 7 харлыг чурттакчызы Тензинниң Кызыл хоорайда «Дрим Тим» бут бөмбүүнүң командазы-биле ужуражыр күзелин бүдүрүп, уттундурбас, аянныг ужуражылганы организастаан. «Дрим Тим» клуву бо хүннерде Кызылдың 17 дугаар школазының баазазында ажылдап турар.
«Чаа чыл бүдүүзүнде «Дрим Тим» командазы-биле ужуражыр күзел бодап алган мен. Бодум хире бичии спортчулар-биле ужуражыксап турган мен. Бут бөмбүүнге ынак мен. Мээң ынак ойнакчым Роналду. Мен база өзүп келгеш, Роналду ышкаш ойнаар мен» – деп, бичии Тензин чугаалаан.
«Дрим Тим» бичии уруглар клуву 2021 чылдың чайын ажылын эгелээн. Чайын даштыгаа, кыжын спорт залынга бичии оолдарга футболду өөредип турар бис. Янзы-бүрү чергениң маргылдааларынга удаа-дараа киржип, шаңналдыг черлерни ап турар апарган бис. Тывадан дашкаар-даа маргылдааларга киржип турар бис. Ноябрь эгезинде Абакан хоорайга регионнар аразынга болган турнирге киришкеш, 2 дугаар чер алдывыс. Эң-не улуг бөлүкте 2009 чылдың оолдары база эң-не бичиилери 2015–2016 чылдарда төрүттүнген оолдар. Бо Тэнзинниң кады ойнап турар командазында 2016–2017 чылдарда төрүттүнген оолдар-дыр. Сөөлгү команданы 2024 чылдың күзүн чыып алган бис. Бичии Тэнзинниң бистиң клубту сонуургай бергенинге өөрүп тур бис» – деп, «Дрим Тим» клувунуң үндезилекчизи Барс Сувандии чугаалааш, Тэнзинге Чаа чылдың чигирзиг белээн сунган.
ТР-ниң Баштыңы Владислав Ховалыг 7 харлыг чаштың күзелин бүдүрүп, ужуражылганы организастааш, Тэнзинниң ынак ойнакчызы Роналдунуң номун белекке сөңнээн.
Айдың ОНДАР.
Буян ООРЖАКТЫҢ тырттырган чуруктары.
«Шын» №100 2024 чылдың декабрь 28
