Август 9-та Кызылдың Аныяктар өргээзинге Тыва Республиканың хүнүнге тураскааткан “Тергиин шыдыраачы-2024” деп ат дээш түңнел оюннарже шилилге маргылдаа эгелээн. Шупту 64 ойнакчы киришкен.
Организаторларның чугаалап тураы-биле алырга, “Шыдыраа” спортунуң дүрүмнеринге дүүштүр маргылдааны эрттирип турар. Маргылдаа 9 кезектиг швейцар система-биле, а жеребёвка Swiss-Manager деп компьютер программазы-биле эртип турар.
“ТР-де Шыдыраа федерациязының” регионалдыг хөй-ниити организациязының даргазы Ренат Ооржактың чугаалап турары-биле алырга, Тывада бо чемпионат ышкаш турнир 2 дугаар чыл эртип турар. Киржикчилер аразында Тываның эң шыырак шыдыраачылары ФИДЕ спортунуң мастери Тамерлан Чындыгыр база Тываның 3 дакпыр чемпиону Долаан Салчак олар база бар.
“Сес харлыг турумда мени шыдырааже эккелген. Оон бээр 27 чыл шыдыраалап тура мен. Бо спорттуң хевиринге дендии ынак мен. Ынчан бодум-на авамны мени тренерлерже чедирерин дилеп турган мен. Мен бичии турумда Кызылга 3 борбак тренер турган. Шыдыраа ойнаар күзелим күштүг турган. Ону чүгле шыдыраачы кижи билир. Тывада шыдыраа оюну ам дендии сайзыраан-дыр. ФИДЕ мастерлери эр шыдыраачылар көвүдеп турар. Маргылдааларга ыяк кызар апаар. Чүге дээрге чииги-биле удуп алыр деп чүүл турбас” – деп, турнирниң киржикчизи, шыдыраага спорт мастери Адыгжы Куулар чугаалаан.
Тиилекчилерни болгаш шаңналдыг черлерниң эдилекчилерин ойнап алган очколарының түңү-биле илередир. Баштайгы шаңналдыг 3 черни алган спортчуларга медальдар, хүндүлүг бижиктер, акша сертификаттарын тыпсыр. Маргылдаа август 13-түң хүнүнге чедир уламчылаар.
Чуруктарны “ТуваМедиаБөлүктен” алган.
