2025 чылдың май 16-да Хову-Аксы суурга “Тергиин участок комиссиязы” деп регионнар аразының IV мөөрейиниң тиилекчизиниң Кубогун Чеди-Хөл кожууннуң Хову-Аксының УСК-ның даргазы Салбакай Монгушка Тыва Республиканың Соңгулда комиссиязының даргазы Лариса Андалаева байырлыг байдалга тывыскан.
Россия Федерациязының 19 субъектизиниң төлээлерин каттыштырган мөөрей мергежилдиң, сырый каттыжылганың болгаш чогаадыкчы чоруктуң езулуг шылгалдазы болган. 178 дугаар соңгулда участогунуң командазы 587 баллды чыып, организастыг чоруктуң бедик деңнелин болгаш ажылга стандарттыг эвес хамаарылганы көргүзүп, тергииннерниң санынче бүзүрелдии-биле кирген.
Мөөрейниң төнчү чадазында Тываны ийи участок соңгулда комиссиязы төлээлээн:
Кызылдың 14 дугаар участок соңгулда комиссиязы «Соңгулда чорудуунга болгаш соңгулда эргелеринче аныяктарның кичээнгейин хаара тудары» деп төлевилел-биле (видео кичээл) мөөрейге киришкен.
Чеди-Хөл кожууннуң 178 дугаар участок соңгулда комиссиязы «Идепкейлиг соңгулда эргелерин боттандырарынга таарымчалыг байдалдарны тургузары» деп төлевилел (видео ажыл) соңгукчуларның аңгы-аңгы бөлүктери-биле ажылдаар комплекстиг арганы көргүскен.
Мөөрейниң кол сорулгазы участок комиссияларының кежигүннериниң эрге-хоойлу билиглерин бедидери, оларның чогаадыкчы эгелээшкинин деткиири болгаш соңгулда кампанияларын чорударының дээштиг арга-хевирлерин киирери болган.
Тыва Республиканың соңгулда комиссиязы киришкен командаларга идепкейлиг киржилгези, бедик мергежили болгаш регионун төлептиг көргүскени дээш өөрүп четтиргенин илереткен.
178 дугаар участок соңгулда комиссиязының коллективинге төлептиг тиилелгези-биле байыр чедирип, харыысалгалыг ажылга моон-даа соңгаар чедиишкиннерни болгаш эгээртинмес энергияны күзедивис.
ТР-ниң Соңгулда комиссиязының медээзинден.
“Шын” №19 2025 чылдың май 22