Январь 25-те, Россияның студентилер хүнүнде, В. Көк-оол аттыг Национал хөгжүм-шии театрынга Тываның күрүне университединиң кайгамчык чараш байырлалы – ректор балы болуп эрткен.
Ук байырлалды үш дугаар чыл тускай шериг операциязының дайынчыларын деткип, оларга ачы-дуза чедирери-биле, “Бис кады бис” деп кыйгырыглыг эрттирип турар. Балдың кол маадырлары университеттиң болгаш ортумак өөредилге черлериниң чүгле өөредилгезинге тергиидээн эвес, а өөредилге чериниң культурлуг, эки турачы, спортчу, эртем талазы-биле хемчеглеринге идепкейлиг киришкен, ТШО-же кыйгырткан шериглерниң өг-бүлелеринге дузалаан, ачы-дуза акцияларын болгаш фестивальдарын организастаан эң-не тергиин доозукчулары болган.
Кыстар чүзүн-бүрүн каас-коя платьелерлиг, оолдарның хөй кезии дайынчыларга мөгейиг кылдыр шериг хептерин кеткен, чамдыктары костюмнарлыг. Фойениң каасталгазы-даа, куттулуп турар хөгжүм-даа 19-ку чүс чылга бүрүнү-биле дүгжүп турар, көрүштүү-даа кедергей.
Бо кежээге студентилер ай-айлары-биле белеткенип келгеннер. Каас хептен аңгыда, янзы-бүрү ук байырлалга дүгжүр танцыларны үр үе дургузунда шиңгээдип келгеннер.
Кайгамчык чараш кежээни Тываның күрүне университединиң ректору Ольга Хомушку ажыткан. Ол сургуулдар-биле кады полонез самын күүсеткен. Ук танцы-биле Россияга шупту байырлыг кежээлерни ажыдар турган деп, ол демдеглээн.
ТывКУ-нуң шериг өөредилге төвүнүң курсантылары байырлыг марштың хөгжүмүнүң дириг күүселдези-биле Россияның болгаш Тываның туктарын киискиткен.
Тываның Чазааның Даргазының оралакчызы Орлан Сарыглар студентилерге Татьяна хүнү-биле байыр чедирери-биле чараш кежээге аалдап келген.
“Шупту билир бис, студент чылдар дээрге кижиниң чуртталгазында эң чараш, кайгамчык болгаш катаптаттынмас чылдар болгай. Ылаңгыя бо ректорнуң балынче чүгле эң тергиин аныяктар чалалганы чаалап алыр. Шупту бедик чүткүлдүг болгаш тура-соруктуг, төлептиг студентилер-дир силер. Силерден бистиң келир үевис хамааржыр. Изиг байырым чедирип тур мен. Ам-даа бурунгаар” — деп, ол аныяктарның хөөнүн көдүрген.
Байырлыг балче келген аалчы бүрүзү ТШО-нуң бирги одуруунда чаныш-сыныш чок дидим оолдарны деткип, бодунуң өмүнээзинден акша-хөреңгини сөңнээн. Чыгган ачы-дузаны Улусчу фронтунуң регионалдыг салбырының кежигүнү Галина Сюрюнге дамчыткан.
Кежээниң эң хүндүлүг аалчылары – ТШО-нуң хоочууннары. Университеттиң бухгалтер учёдунуң кафедразының доцентизи, ТШО-нуң хоочуну Буян Донгак студентилерге дайынчыларның адындан байырын сөңнээн.
“Бо кайгамчык кежээде студентилерге ТШО-нуң хоочуннарының өмүнээзинден байырны чедирип тур мен. Бөгүн ТывКУ-дан ТШО-да 249 дидим оолдар киржип турар. Бүгү батальон деп болур. Чидириглер база бар, 8 маадыр амы-тынын хайырлавайн бажын салган– деп, Буян Донгак чугаа- лааш, — маадырларны кажан-даа утпайн, оларның дидим чоруун мөңгежидери чугула” — деп демдеглээн.
Кежээниң эң кол кезээ – тергиин студентилерни хүндүткеп байырлаары болгаш оларга сертификаттарны тыпсыры. Факультет бүрүзүнден болгаш ортумак профессионал өөредилге черлеринден янзы-бүрү адырларга бедик үре-түңнелдиг болган аныяктарга шаңнал-макталдарны тывыскан.
Ниитизи-биле 300 студент кежээниң аалчылары болган. “Море”, “Офицеры”, “Матушка-Земля” дээш оон-даа өске патриотчу ырыларны кежээге күүсеткен. Түңнелинде, студент бүрүзү сессиязын “кудурук чок”, чедиишкинниг хаар кылдыр бот-боттарынга чаагай күзээшкиннерни сөңнээн.
Олча ОНДАР.
Буян Ооржактың тырттырган чуруу.
“Шын” №3 2025 чылдың январь 30









