Кызыл кожууннуң Баян-Кол сумузунда Кызыл-Чыраа деп черге теве кыргылдазының фестивалы болуп эрткен. Чыл санында болур бо хемчегни Май 1 байырлалының бүдүүзүнде эрттирери чаңчыл болган. Бо фестиваль тус чер чурттакчыларының улуг сонуургалын оттуруп турар. Бо чылын аңаа 100 ажыг кижи киришкен.
Теве кыргылдазы – Баян-Кол суурнуң чурттакчыларының чыл санында эрттирер чаңчылы-дыр деп, «Баян-Кол» МУБ-туң директору Эдуард Чымба чугаалаан.
«Бөгүнгү фестивальда Баян-Кол суурнуң аңгы-аңгы кудумчуларының чурттакчылары киржип турар. Бир кудумчу-ла – бир команда. Кыргылданың төнчүзүнде эң-не хөй теве кыргаан команда шүглүр. Тиилекчилер 5000 рубль биле дириг хойну шаңналга алыр. Ийиги чер алганнар 3000 рубль биле база дириг хой, үшкү чер – 3000 рубль-биле шаңнадыр» - деп, ол дыңнаткан.
Теверлерни чурум езугаар чылда чаңгыс катап, чазын кыргыыр. Дуржулгалыг 6 шыырак эр бир тевени туткаш, ужурар. Ортумаа-биле бир теведен-не 7 килограмм дүк алыр.
Бо хүнде «Баян-Кол» МУБ-та 100 ажыг улуг теве база 14 бодаган бар.
Буян Ооржактың тырттырган чуруктары.
