Октябрь 10-да Эрзин кожууннуң Бай-Даг суурга болур бир дугаар Тевежилер байырлалы – Тывага онзагай болуушкун. Ол черлерниң тевежилери, тожу тывалары ышкаш, боттарының чаңчылчаан амыдыралын салбайн, өгбелериниң арттырган өнчү салгалын камныг кадагалап эдилеп чоруур Россияның үндезин чоннарынга хамааржыр.
Тывада теве малдың ховартаан болгаш чидип бар чыдар бир хевирин Бай-Даг сумузунда азырап өстүрүп турар. Тус чер чурттакчылары оларны камгалап-кадагалаарынга идепкейлиг киржип чоруур.
Байырлал регионга үндезин мал ажыл-агыйын хөгжүдеринге болгаш культурлуг өнчү-хөреңгини кадагалап арттырарынга сонуургалдыг 460 хире киржикчилерни хаара тудар.
Республика байырлалының программазында янзы-бүрү хемчеглер кирген. Ында уран-шеверлерниң делгелге-ярмарказы болгаш тожу тываларының байлак культуразын бараалгаткан темалыг шөлдер бар.
«Төөгү болгаш амгы үе: тевелер санын өстүрүп, адырны хөгжүдеринче базымнар» деп темалыг «төгерик столду» планнаан. Аңаа республикада теве малдың баш санын көвүдедиринге болгаш теве ажыл-агыйын хөгжүдеринге хамаарышкан айтырыгларны сайгарып чугаалажыр.
Оон аңгыда мал ажыл-агыйынче болгаш бодунуң чонунуң культуразынче аныяктарның сонуургалын хаара тударынче угланган «Теве — ховунуң корабли» деп бичии уругларга мөөрей Бай-Даг суурга болур.
Бистиң корр.
Чурукту интернеттен хоолгалаан.
«Шын» №39 2025 чылдың октябрь 9