Чурттакчыларның идепкейлиг бадылаанының түңнелинде Тываның командазы таарымчалыг хоорай хүрээлеңин тургузарының эң эки төлевилелдериниң Бүгү-российжи мөөрейинге тиилээн. Бистиң республика 2026 чылда төлевилелдер боттандырыышкынынче федералдыг деткимчени алыр. «Казань Экспо» делегей чергелиг делгелге төвүнге, Россияның Тудуг яамызының организастааны «Биче хоорайларны база төөгүлүг суурларны хөгжүдери» Х Бүгү-российжи шуулганда тиилекчилерни чарлаан ёзулал соонда Тываның Баштыңы Владислав Ховалыг бодунуң блогунда дыңнаткан.
«Бистиң Национал парыгывыс база Бии-Хем кожуун 2026 чылда боттарының төлевилелдерин боттандырарынга федералдыг деткимчени алыр. Тиилекчилерге байыр чедирип тур мен! Чаңгыс чер чурттугларывыска таарымчалыг байдалдарны тургузар дээш, бүгү-ле күжениишкиннерни салыр бис».
Бии-Хем кожууннуң Туран хоорайда «Тываже эжик. Комсомольская кудумчузу – Пятак – Автовокзалды хөгжүдериниң болгаш чаагайжыдарының концепциязы» деп төлевилел мөөрейге тиилээннерниң бирээзи.
Бии-Хем кожууннуң чаа төлевилели хоорайже болгаш республикаже кирер черинде белдир черге эптиг болгаш сонуурганчыг девискээрни тургузар. 825 олуттуг чаа школа тудуу-биле кады кижилер кылаштаар черлерни чаагайжыдары – онза кичээнгейде.
РФ-тиң Тудуг яамызы, Тываның Чазаа, Тываның Тудуг яамызы, Федерация Чөвүлелиниң сенатору Шолбан Күжүгет база Күрүне Думазының депутады Айдың Сарыглар эгелээшкинни боттандырарын деткээн. Дөзевилекчи Алдынай Байкара биле төөгүчү Татьяна Верещагина база чон ону деткээн.
2025 чылда «Амыдыралга инфраструктура» национал төлевилелде «Таарымчалыг хоорай хүрээлеңин хевирлээри» федералдыг төлевилелдиң боттаныышкыны-биле Тывада 33 хөй-ниити шөлү чаарттынар. Биче хоорайларга таарымчалыг хүрээлеңни тургузар талазы-биле Бүгү-российжи мөөрейге тиилээн төлевилелдер: Чадаанада «9 кожуун төвү», Ак-Довуракта «Ак тоолчургу чугаа», Шагаан-Арыгда Дружба кудумчузунуң кижилер кылаштаар черин чаагайжыдары, Кызылда «Тыва кавай», Туранда хамааты дайынының маадыры Сергей Кочетов кудумчузун чаартыр объектилер улуг ужур-уткалыг.
Бистиң корр.
2025 чылдың август 28 “Шын” №33