«ЫРААЖЫ МАЛЧЫН» МӨӨРЕЙ
Тываның малчыннарының аразынга “Ыраажы малчын” мөөрей республиканың чурттакчы чонунуң улуг сонуургалын оттурган. Малчыннарның аразында кайгамчыктыг чараш үннүг ыраажылар барын бо мөөрей илереткен. Оларның чамдыызының ырлаары профессионал ыраажылардан дудак чок дээрзин мөөрей бадыткаан. “Ыраажы малчын” мөөрейни чылдың-на Наадымга уткуштур эрттирип турар апарган. Бо мөөрейниң кожууннар чергелиг көрүлделери Наадым мурнуу чарыында эртип турар.
Бай-Тайганың ыраажы малчыннарының аразынга кожуун чергелиг көрүлде август 4-те болуп эрткен. Аңаа беш ыраажы малчыннар киришкен. Бай-Тайга дээрге ыраажылар ораны болгай. Бо кожуундан бүгү Тывага ат-сураа алгаан ыраажылар үнген. Кожуун чергелиг көрүлдеге сумуларга эрткен “Ыраажы малчын” мөөрейниң тиилекчилери киришкен. Оларның кайызы эң дээре ыраажы малчын деп илередири жюриниң кежигүннеринге нарын шилиишкин болган.
“Ыраажы малчынның” кожуун чергелиг мөөрейиниң бирги чергениң диплому-биле Шуй суурдан Байлаңмаа Доңгак шаңнаткан. Ийиги болгаш үшкү чергениң дипломнарынга Тээли сумудан Чечек Өпей, Ээр-Хавак сумудан Чойганмаа Хертек тус-тузунда төлептиг болганнар.
Бай-Тайганың малчыннарының ыраажы ат-алдарын Байлаңмаа Доңгак “Ыраажы малчын” мөөрейниң республика чергелиг чадазынга камгалаар.
Бистиң корр.