Каа-Хем суурда улуг спортчу-культура төвүнүң ажыглалга киргени республикада база бир улуг чугула болуушкун. Ооң тудуун 2013 чылда эгелээш, Улуг Тиилелгениң 80 чылы 2025 чылда тудуп дооскан болгаш, ону “Тиилелге” деп адаан.
“Тиилелге” спортчу-культура төвүнүң байырлыг ажыдыышкыны спорттуң болгаш уран чүүлдүң кончуг чараш байырлалы апарган. Чаа спортчу ордуну сонуургап келген чон дыка хөй болган, 4500 олуттуг улуг арена шыгырт долу.
Чаа спортчу-культура төвүнүң байырлыг ажыдыышкыны Россия Федерациязының, Тыва Республиканың болгаш Улуг Тиилелгениң туктарын киискидип кииргени-биле эгелээн.
Республикада эң улуг спорт болгаш культура ордузунуң ажыглалга киргени, ону байырлыг байдалга ажытканы-биле Тываның Баштыңы Владислав Ховалыг регионнуң чонунга, эң ылаңгыя спортчуларга, изиг байырны чедирип, бо спортчу аренага улуг тиилелгелерни оларга күзээн. “Тиилелге” спорт ордузун ажыткан байырлалдың эң хүндүткелдиг аалчылары – Ада-чурттуң Улуг дайынының болгаш Россияның эрге-ажыы дээш дайынчы хөделиишкиннерниң хоочуннары, тускай шериг операцияның киржикчилери дайынчылар деп ол айыткан. “Тиилелге” спорт-культура төвү Россияның Президентизи Владимир Путинниң болгаш РФ-тиң Чазааның деткимчези-биле туттунганын, “Хайленд Голд” болгаш “Эльбрус Металл Литий” компаниялар, ол ышкаш “Сбербанкының” деткимчези-биле адаптивтиг спорт хевирлериниң залын дерип каанын республиканың удуртукчузу демдеглээн.
“Тиилелге” төвү спорттуң хөй хевирлерин Тывага хөгжүдеринге, Россия болгаш делегей чергелиг маргылдааларга чайыннанчак тиилелгелерни чаалап ап, Тываның ат-алдарын бүгү делегейге көдүрер бедик арга-мергежилдиг спортчуларны белеткээринге улуг ужур-дузалыг боор дээрзин Владислав Ховалыг чугаалаан.
“Тыва эр кижиниң үш оюну” деп көргүзүг спорт болгаш культура төвүнүң байырлыг ажыдыышкынын аажок каастаан. Спортчу оолдар тыва хүрешти, аът чарыштырарын, ча адарын ойнап көргүскеннер.
Спортчу-
культура төвүнүң дээвиириниң орту кезээнде азып тургускан улуг экранга Тываның спортчуларының Россия, Европа болгаш делегей чергелиг маргылдааларга киржилгезин, тиилелгелерин көргүскен. Чүгле 2025 чылда Тываның спортчу командалары Россияның бирги чери дээш сумо хүреш, Россияның кубогу дээш кикбоксинг, Россияның кубогу дээш хүреш маргылдааларынга тергиидээн. Тываның спортчулары янзы-бүрү маргылдааларга 222 алдын медальды, 147 мөңгүн, 270 хүлер медальдарны чаалап алганнар.
Тываның спортчуларының биче салгалы, хүреш, гимнастика, бокс, футбол дээш өске-даа спорт федерацияларының бичии спортчулары чараш оюн-көргүзүгнү “Тиилелге” ордунуң байырлыг ажыдыышкынынга чыылган чонга бараалгаткан.
Ш. МОҢГУШ.
Буян ООРЖАКТЫҢ тырттырган чуруктары.
“Шын” №50 2025 чылдың декабрь 25
