ТР-ниң Баштыңы В.Ховалыг ЛУР-га ажыл-агыйжы сургакчылаашкын үезинде республиканың хөй омак-сөөктүг чонунуң өмүнээзинден тус черниң чурттакчыларынга Тиилелге хүнүн таварыштыр байыр чедиргениниң дугайында бодунуң блогунга демдеглээн.
«Свердловскиниң баштыңы Андрей Сухачевтуң чалалгазы-биле «Качыгдаан ие» тураскаалының чанынга болган митингиге кириштим. Тус черниң чурттакчылары тыва шериглерни кончуг эки билир» – деп, В. Ховалыг чугаалаан.
Бо төөгүлүг хүнде свердловчуларны деткиири-биле хемчегге тыва шериглер база киришкен. Оон-даа өөрүшкүлүг чүүл болза, Төп шериг округунуң генерал-майору Валерий Муминджанов-биле шериглерге күрүне шаңналдарын кады тывыскан.
Оон ыңай ТР-ниң Баштыңы Тывадан келген шериглер боттарының ада-өгбелериниң изи-биле чоруп орар дээрзин демдеглээн:
«ССРЭ-ниң фашистер-биле тулчуушкунунга эң-не баштайгы эвилелдешкен даштыкы күрүнелерниң бирээзи Тыва Арат Республика дээрзин кижи бүрүзү билбес. Олар Ада-чурттуң Улуг дайынының бир дугаар хүнүнде, июнь 22-де, эвилелдежиишкин дугайында чарлаан. А ТАР-ның эки турачылары Украина девискээринге дайзынны чылча шапкан.
Бистиң ажыл-херээвис чөптүг. Тиилелге хүнү-биле байыр чедирип тур мен!» – деп, сөстер-биле чугаазын ТР-ниң Баштыңы Владислав Ховалыг дооскан.
