Амгы үеде аравыста бо ёзулалды 5 дайын хоочуну, 34 тылдың ажыл-ишчизи, 24 амы-тынындан чарылган дайын хоочуннарының кады чурттаан эштери бистиң-биле кады демдеглеп эрттирип турар.
Байырлыг хемчег 55-ки мото-адыгжы (даг) бригаданың үрер хөгжүм оркестриниң хөгжүм үделгези-биле эгелээн. Кызылдың гарнизонунуң даргазы, майор Азат Фатхутдинов митингини ажыдары-биле сөстү алган: “Ада-чурттуң Улуг дайынының Тиилелгезиниң 78 чылдаанынга тураскааткан митингини ажыттынган деп чарладым!” Улаштыр Тыва Республиканың болгаш Россия Федерациязының ыдык ырлары чаңгыланган.
Кажан фашистиг Германия Совет эвилелинче халдаан үеде, тыва чон дайзынны узуткаары-биле Кызыл шеригге дузалажыр дээш, бүгү күжүн мөөңнеп турган. Совет болгаш тыва чоннуң найыралы бистиң өгбелеривистиң немец фашистер-биле демисежип тургаш төккен ханы-биле ыдыктаттынган.
Ада-чурттуң Улуг дайынынга киржип тургаш, госпитальга-даа, тайбың үеде-даа амы-тынындан чарылган бүгү-ле солдаттарга тураскааткан сактыышкынның минутазын чарлаан. Тураскаалдарга чечектер салган соонда, сактыышкын ёзулалы доозулган.
Ч. СААЯ белеткээн
Буян ООРЖАКТЫҢ тырттырган чуруктары
