Бөгүн, май 8-те, найысылал Кызылга Тиилелге шөлүнге Ада-чурттуң Улуг дайынының киржикчилериниң тураскаалынга боодал чечектерни салыр ёзулал болуп эрткен.
Байырлыг ёзулалга Ада-чурттуң Улуг дайынының 1 хоочуну, дайын хоочуннарынга дең эргелиг 3 хамааты, тылдың 50 ажыл-ишчилери, хоорайның чазак-чагыргазы, янзы-бүрү яамыларның, албан черлериниң төлээлери, дайынчы хөделиишкиннерниң хоочуннары, Россияның маадыры Буян Куулар база хөй-хөй күзелдиг кижилер кээп киришкен.
Байырлыг хемчег 55-ки гвардейжи мото-адыгжы (даг) бригаданың үрер хөгжүм оркестриниң хөгжүм үделгези-биле эгелээн.
“Май 9 дээрге бистиң чер-чуртувус дээш дайылдажып чораан дайынчы өгбелеривистиң тиилелгези, а бистиң салгалдың чоргааралы-дыр. Ада-чурттуң Улуг дайынынга киржип чораан чаңгыс чер чурттугларывыстың тиилелгези, маадырлыг чоруу бисти, тускай шериг операциязының киржикчилерин, сорук киирип, хей-аъдывыс көдүрүп чоруур. Оларга бис чоргаарланып, үлегер-чижек кылдыр көрүп, дидим болгаш төлептиг дайылдажып чор бис. Бистиң демниг чонувус үргүлчү гуманитарлыг дузаны чыып чорудуп, бүгү талазы-биле бисти деткип чорууру улуг чоргаарал. Тиилелге бистии болур. Ада-чурттуң Улуг дайынының хоочуннарынга, тускай шериг операциязының киржикчилеринге база шуптуңарга кадыкшылды, аас-кежикти, чаагай чорукту күзедим. Кол-ла чүве бистиң дайынчыларывыстың онча-менди чанып келири” – деп, Россияның маадыры Буян Куулар чугаалаан.
Кажан фашистиг Германия Совет эвилелинче халдаан үеде, тыва чон база-ла дайзынны узуткаары-биле Кызыл шеригге дузалажыр дээш, бүгү күжүн мөөңнеп турган. Совет болгаш тыва чоннуң найыралы бистиң өгбелеривистиң немец фашистер-биле демисежип тургаш төккен ханы-биле ыдыктаттынган.
Ада-чурттуң Улуг дайынынга киржип тургаш, госпитальга-даа, тайбың үеде-даа амы-тынындан чарылган бүгү-ле солдаттарга тураскааткан сактыышкынның минутазын чарлаан. Тураскаалдарга чечектер салган соонда, сактыышкын ёзулалы доозулган.
Чыжыргана СААЯ.
Буян Ооржактың тырттырган чуруктары.
