Тускай шериг операциязынче удавас чүък чорударынга белеткел ажылдары уламчылап турар. Чаа чылдың байырлалын уткуштур Тываның малчыннарының болгаш эът-чем-биле сырый харылзаалыг ажылдап чоруур сайгарлыкчыларның доңурган эът чорудары чаңчыл болу берген. Республиканың аңгы-аңгы кожууннарының төлээлери доңурган эът, мотоцикл, чылыг идик-хеп, моторлуг хирээ, тепловизор дээш дайынчы хөделиишкиннер девискээринде чаңгыс чер чурттугларның хереглээри бүгү чүүлдү чыып турар.
Декабрь 9-та Барыын-Хемчик, Мөңгүн-Тайга, Чаа-Хөл кожууннарның төлээлери чоннуң чыгган деткимчезин, дериг-херекселдерин Бүгү-российжи улусчу фронтунуң ТР-де салбырынга хүлээткен.
Барыын-Хемчик кожууннуң төлээзи Артур Ооржак:
– Барыын-Хемчик кожууннуң ажыл-ишчи чону гуманитарлыг дуза чыырынга идепкейлии-биле киржип турар. Бөгүн чылыг хептерни, 1 мотоцикл, 350 килограмм доңурган хой эъдин, четкилерни эккелдивис. Малчыннарывыстың берген эъди-дир. Кожууннуң көдээ ажыл-агый эргелелиниң техниказында чүдүрүп алгаш келдивис. 2 генератор база бар. Чаңгыс чер чурттугларывыс удаа-дараа дузалажып турар. Маадырларывыска тура-сорукту, кадыкшылды, тиилелгелиг чанып келирин күзээр-дир бис.
Мөңгүн-Тайга кожууннуң төлээзи Алимаа Бадыма 11 камгаланыр четкини, инек, хой, сарлык, аът эъдин эккелгеш хүлээткен. Олар ТШО эгелээрге-ле, гуманитарлыг дуза чыыр патриотчу ажылга идепкейлии-биле киржип турар. Бо удаада он дугаар келгени ол.
«Бөгүн бис кожуунувустуң чонунуң дайынчы хөделиишкиннер девискээринде маадырлыы-биле төрээн чуртунга тайбың дээр дээш тулчуп турар дайынчыларывысты деткиири-биле чыгган дузазын чүдүрүп эккелдивис. Кыштың соогунда Тыва чонунуң чоруткан эъдин дүлүп чип, күш кирип алыр аргалыг болзун дээш, 400 килограмм доңурган хой эъдин хүлээдип келдивис. Эъттен аңгыда, чоннуң чыгганы чылыг идик-хеп, чаштынар четкилер дээш оон-даа өске дериг-херекселдерни эккелдивис» – деп, Чаа-Хөл кожууннуң чагырга даргазы Аркадий Одегей чугаалады.
Тускай шериг операциязы хамыктың мурнунда чонну камгалап, чуртка айыыл чок чорукту тургузуп турар. Ооң кол сорулгазы – чүгле чуртту камгалаары эвес, а ында чурттап турар чонга тайбың чорукту чедип алыры дээрзин сагындыраал.
Тускай шериг операциязында киржип турар дайынчыларга ачы-дуза чыыр пунктулар дараазында адрестерде ажылдап турар: Кызыл хоорай, Тыва эки турачылар кудумчузу, бажың 3, кабинет 3, харылзажыр телефону: 8 (39422) 2-10-50; Кызыл партизаннар кудумчузу, бажың 30, кабинет 106.
Чаа чыл байырлалын уткуштур декабрь ортан үезинде Тывадан чүъктүг машина тускай шериг операциязынче үнүптер.
Айдың ОНДАР.
Буян ООРЖАКТЫҢ тырттырган чуруктары.
“Шын” №48 2025 чылдың декабрь 11
