Байырлалдар хүннеринде Улуг Тиилелгениң 80 чыл оюнга база Ада-чурт камгалакчызының чылынга тураскааткан республика, регионнар база Россияның бирги чери дээш хөй маргылдаалар солун, бедик деңнелге болуп эрткен.
Май 9-та В.С. Биче-оол аттыг "Хүреш" стадионунга чаңчыл езугаар тыва чоннуң ынак оюну хүреш кончуг солун, бедик көдүрлүүшкүннүг болуп эрткен. Маргылдааны ТР-ниң Спорт яамызы, Национал спорт сайзырадыр төп база Тыва хүреш чөвүлелиниң удуртулгазы-биле национал спортту сайзырадыр база кадык амыдыралче чүткүл дээш төлевилелдерни боттандырар сорулгалыг эрттирген.
Маргылдааның ажыдыышкынында Тываның Баштыңы Владислав Ховалыг база Дээди Хуралдың Даргазы Каң-оол Даваа мөгелерге, көрүкчүлерге база моол аалчыларга Тиилелгениң 80 чыл оюн таварыштыр спортчу эп-найыралды быжыглаары-биле байырны чедиргеннер.
“Саяннар” ыры-сам ансамблиниң самчылары, ыраажылары, хөөмейжилери хөгжүмнүг байырны бараалгатканнар. Май 9-туң хүнү кайгамчык сериин болганындан паркка база "Хүреш" стадионунга чаш ажы-төл эдерткен, улуг-бичии чоннуң хөйүнден маргылдаа езулуг тыва чаңчыл-биле улуг өөрүшкү-маңнайлыг эрткени кажан-даа уттундурбас.
Маргылдааны эгелээри-биле кол шииткекчи Кайгал-оол Донгак база чарлакчы Арсен Ондар орустап, тывалап мөгелерниң чыскаалын, девиин эгелээннер. Шыырак дээн 128 мөгениң хүрежинге 31 кожуун болгаш республиканың бедик аттарлыг мөгелери киришкен. Маргылдааның 3-кү салыында, 32 мөгениң хүрежинге, мөгениң майыы кадырык дээни ышкаш, Сүт-Хөлдүң аныяк мөгези Сүлде Донгак Чөөн-Хемчиктен Арзылаң мөге Мөңге-Эртине Кууларны хончу хүрежинге, дүрген дегээлээр, мундурар аргаларны ажыглааш, октаан. Улаштыр дидим чараш хүрешти Эрзин кожууннуң аныяк мөгези Айыс Данзырын ажыр базар арганы дүрген кылгаш, Сүт-Хөлден Хартыга мөге Начын-Мерген Ооржакты октааш, көрүкчүлерниң хей-аъдын көдүрген. Салыглар аразында “Уван Шу” бөлүү, чарлакчы, ыраажы Арсен Ондар, 55-ки гвардейжи мото-адыгжы (даг) бригадазындан ыраажылар тыва ырыларны чонга бараалгатканнар.
Тулган тиилекчи дээш 8 арткан шыырак мөгениң хүрежинге Чаан мөге Айдың Монгуш дүрген чараш дегээ база кежир балдырлаар аргаларны улай ажыглап, Чаан мөге Сайын-Белек Түлүштү октааш, шүглүп үнген. Шаңналдыг 3–4-кү черлерни кады төрээн Начын мөге алышкылар Бады-Маадыр биле Темир-Хая Самданнар үлешкеннер. Дараазында 5–8-ки шаңналдыг черлерже Хартыга мөге Эртине Хомушку (Мөңгүн-Тайга), Түметей Ширижик (Сүт-Хөл), Айыраан Ижи (Эрзин) база Гьяцо Дадый киргеннер. Шүүлген мөге кубок, 300 муң рубль, үжүүрлешкен мөге 100 муң рубль шаңналды алганнар. 3–4 дугаар черлерге 50–50 муң рубль, 5–8 чедир мөгелерге 25 муң рубль шаңналдыг болган. Ол ышкаш 5 муң рубльдиң тускай шаңналдарынга "Чараш арга" дээш Сүлде Донгак (Сүт-Хөл) база Айыс Данзырын (Эрзин) төлептиг болганнар.
/ Алексей ЧАМБАЛ-ООЛ,
спорттуң хоочуну.
Буян ООРЖАКТЫҢ тырттырган чуруктары.
«Шын» №18 2025 чылдың май 15
