Чаа чыл бүдүүзүнде улугларга-даа, уругларга-даа янзы-бүрү хемчеглерни чер-черлерде культура ажылдакчылары дүн-хүн чок организастап турар.
Ак-Довурак хоорайның Кадр-оол Сагды аттыг уран чүүл ордузунуң культура-массалыг хемчеглер режиссёру, Тыва Республиканың культуразының алдарлыг ажылдакчызы Шончалай Сааяның медеглээни-биле алырга, уран чүүл ордузунда байырлыг хемчеглер уламчылап турар. Бичии уругларга таарыштыр тургускан "Чаа чылдың хуулгаазын чайганыыжы" деп театржыткан оюн-тоглаалыг концертти культура ажылдакчылары чонга бараалгаткан.
Көрүкчүлер, ылаңгыя чаштар, кезек үеде ёзулуг тоол оранынче шымнып кире бергеннер. Концертти ийи Хар-Кадай ажыткан. Улаштыр театржыткан көргүзүгнүң кол маадыры чурукчу залдың кырыкы каъдындан чадалап ырлап бадып келгеш, бичии көрүкчүлер-биле аялга аайы-биле мендилешпишаан, сценаже дүжүп келген. Хуулгаазын будуктары-биле чуруп эгелээнин илередип, артыкы талазында тургускан улуг көзенекке бийири-биле дээптерге-ле, каас-чараш хептерлиг янзы-бүрү мультфильмнер маадырлары үнүп кээп, бичии көрүкчүлерни өөртүп, мультфильмерден үзүндүлерни ойнап, ырлап самнап турганнар. Театржыткан хемчегде киржилгелиг маадырлар: «Үш диисчигеш», "Барбоскиннер", "Смешариктер", "Лунтик, Вупсень, Пупсень деп ийи курт, Мила», «Койгун биле Бөрү», «7 гном база Белоснежка» дээш оон-даа өскелер болгаш Чылбыга-Кадай. Бичии чаштар маадырларны адыш часкап уткуп, улуг сонуургал-биле тоолчургу оюн-тоглааны көргеннер. Тоолчургу концертти Аржаана Доржу режисёрлаан, а Ай-Чүрек Сарыглар, Амина Монгуш танцы-самны тургускан.
А. ОНДАР.
Чурукту интернет четкизинден хоолгалаан.
“Шын” №50 2025 чылдың декабрь 25