Тываның бир кайгамчыктыг болгаш эм шынарлыг черлериниң бирээзи Үш-Белдирниң капиталдыг септелгези кидин түлүк. Курорттуң чаартылгазы “Серебрянка” профилакторийинге каттыштырыптарга эгелээн. Ооң капиталдыг септелгезинче акша-хөреңгини республика бюджединден Тываның Баштыңы Владислав Ховалыгның деткимчези-биле киирген. Ооң эгелээшкини-биле Тываның алдарлыг эмнелге курордунга чаартылгалар эгелээн.
Чараш оранче чедип алыры нарын, орук-суур кадыр, тайга-таскыл черлерде турар. Ооң уржуундан тудуг материалдарын чедирип алыры берге. Эрткен чылдан тура вертолёт болгаш хемелер ачызы-биле чогуур материалдарны аппарып турар. МИ-26 вертолёт-биле аар техниканы база чедирген, ол дээрге “Беларус” трактор болгаш “Соболь” микроавтобус-тур. Ук транспорт-биле арга-шинээ кызыгаарлыг дыштаныкчыларны тус черниң аэропордундан курортка чедир аргыштырар.
Чаартылга үезинде оран-саваларның эргижирээн серилерин болгаш шывыгларын солаан, ийи каът оран-саваны катап тудуп турар, ооң ачызында эмненип болгаш дыштанып алыксап турар кижилерниң саны ийи катап көвүдээр. Чаа чунар корпус база туттунган.
Чаа корпустуң ачызында суг-биле эмненир процедураларны көвүдедир. Септелге ажылдары чоруп турза-даа, дыштаныкчыларны хүлээп алыр болгаш эмнээр ажылдар үзүктелбээн. Июньда бо сезоннуң бирги бөлүк дыштаныкчылары самолёт-биле – Россияның социал фондузунуң Тыва Республикада эргелелиниң шиитпири-биле келген. Олар сөөк-даяк, нерв системазын болгаш оон-даа өске аарыгларын эмнедир сорулгалыг келген.
Курорт июньдан август айга чедир ажылдаар. Чылдың-на маңаа 400 хире кижи дыштанып турар, эмнээшкин ортумаа-биле 10-дан 14 хонук чедир үргүлчүлээр. Үш-Белдирже чоннуң сөөртүлгезин “Тува Авиа” организастап турар.
Эм-таң шынарлыг оранда азот, сероводород болгаш кремний-биле бай, онзагай изиг минералдыг суглар бар. Олар нерв, сөөк-даяк, шыңган, чүрек-дамыр системаларын, эът-кештиң байдалын экижидер. Ол ышкаш херээжен болгаш эр улустуң аарыгларын эмнээрде, янзы-бүрү процедураларны ажыглап турар.
Курорттуң онзагай бойдус курлавырлары нерв системазының янзы-бүрү аарыгларынга (моюн болгаш ооргада остеохондрозка, чүстерге болгаш оорганың аарыгларынга), скелет-шыңган системазының (ревматоидтиг артрит, шыңганнарның аарыглары, полиартрит, артроз), чүрек-дамыр системазының болгаш өске-даа аарыгларны эмнээринге чогумчалыг.
Эмчилер болгаш өске-даа ажылдакчылар реабилитация талазы-биле арга-дуржулгалыг, олар билиглерин доктаамал бедидип, чогуур белеткелди эртип, дыштанып турар улусту бедик деңнелдиг эмчи дузазы-биле хандырып турарлар. Айыыл чок чорукче база улуг кичээнгейни угландырган. Камгалалдыг черде турар объектини аңныыр ажылдакчылары кадарып турар. Онза байдалдар тургустунуп кээр болза, санитарлыг авиация дүрген дуза чедиреринге белен.
Тываның кадык камгалал сайыды Анатолий Югай курорттуң септелге ажылдарын хынап четкен. Сайыттың демдеглээни-биле, курорттуң инфраструктуразы улуг үрелген, келир үеде септелге ажылдарын калбаа-биле чорудар. Чаартылганың хөй чарыгдалы транспорт харылзаазының нарыны-биле холбаалыг, ынчангаш бюджет деткимчези доктаамал негеттинер.
Чаартылга соонда «Үш-Белдирге» эмнээшкинниң аргаларын калбартыр. Ол туризмни хөгжүдер кайгамчык чер болур. Даштыкы чурттардан болгаш өске регионнардан аалчылар келиринге бир улуг идигни бээр дээрзинге бүзүрелдиг.
ТР-ниң Чазааның медээзинден О. АК-ООЛ белеткээн.
Чурукту интернеттен хоолгалаан.
“Шын” №26 2025 чылдың июль 10