Амгы үеде Улуг-Хем кожууннуң Торгалыг суурда «Узун болгаш идепкейлиг назын» деп национал төлевилелдиң боттандырылгазы-биле чаа эмнелге амбулаториязының тудуу чоруп турар. Бо эгелээшкин кадык камгалал адырының эмнелге албан черлерин чаартырынче болгаш экижидеринче угланган. Ооң кол сорулга- зы — чонга эмчи ачы-дузазын кезээде белен болгаш чедингир болдурары.
Амгы үеде тудуг шөлүнде ажылды планнаары, ук девискээрниң богун аштап-арыглаары, экскаватор дузазы-биле черни дескилээри дээн ышкаш кол ажылдар чоруп турар. Арматура четкизин белеткээр ажыл база чедиишкинниг доозулган. Тудуг ажылдарының дараазында чадаларынче шилчииринге белен. Ооң мурнунда хыналда үезинде илереттинген сагындырыгларны шуптузун эткен. Бо хүнде шаланы салырынга белеткеп, дескилей кудар, херимни тургузар, хырбалап каан брус ыяштарны салыр ажылдар идепкейлиг чоруп турар. Амбулатория девискээринде тускай эртемниг беш ажылдакчыдан тургустунган бригада ажылын кызымаккай уламчылап турар. Ында тудуг ажылдарының 20 хуузу кылдынган.
Тыва Республиканың кадык камгалал сайыды Анатолий Югай тудуг объектизинге баргаш, ажылдың шынарын болгаш хуусаазынга дүгжүп турарын хынаан. Ындыг үнүүшкүннер хүлээникчи тудугжуларның харыысалгазын бедидеринге болгаш тудуг ажылдарын дүргедедиринге дузалаар дээрзин демдеглээри чугула.
“Узун болгаш идепкейлиг назын” төлевилели чүгле Торгалыгда чаңгыс амбулатория-биле кызыгаарлаттынмаан. 2021 чылдан эгелеп кадык камгалалының бирги звенозун чаартыр программа ёзугаар Улуг-Хем кожууннуң эмнелге инфраструктуразын экижидер талазы-биле элээн каш ажылдар чоруттунган. Кожууннар аразының эмнелге төвүнүң уругларның соматика салбырынга капитал септелгени чоруткан. Ол ышкаш Арыг-Үзүү биле Хайыракан суурларда эмнелге амбулаторияларын туткан, Ийи-Талда фельдшер-акушер пунктузун ажыткан.
«Узун болгаш идепкейлиг назын» национал төлевилел республиканың чурттакчыларынга узун назылап, идепкейлиг чурттаар байдалдарны тургузарынче угланган. Төлевилелдиң кол сорулгаларының бирээ- зи — эмчи дузазын чедирер амгы үениң чаа аргаларын нептередири. Аңаа чүгле чаа эмнелге объектилерин тудары эвес, а оларны амгы үениң дериг-херекселдери-биле чүмнээри, эмнелге ажылдакчыларының мергежилин бедидери база эмчи ачы-дузазын чедингир болдурары хамааржыр.
Бо күжениишкиннер хамааты бүрүзү үезинде болгаш бедик шынарлыг эмчи дузазын алыр аргалыг болурун чедип алырынче угланган. Ол бодунуң ээлчээнде чурттакчы чоннуң кадыын ниитизи-биле экижидеринге болгаш амыдыралдың шынарын бедидеринге идигни бээр.
Чыжыргана СААЯ.
Чуруктарны Кадык камгалал яамызындан алган.
“Шын” №29 2025 чылдың июль 31
