«Узун болгаш идепкейлиг назын» национал төлевилел болгаш кадык камгалалының бирги звенозун чаартыр программа ёзугаар Тожу кожууннуң Чазылары суурда чаа фельдшер-акушер пунктузун ажыткан.
Ында тудуг ажылдары доозулган, мебель болгаш эмнелге дериг-херекселдерин салган. Амгы үеде шынар талазы-биле удуртулга системазының дүрүмнери ёзугаар эжиктерде чогуур табличкаларны салып турар.
Чедери берге, ыраккы кожууннуң суур черлеринге чаа объектилерниң тудуу чурттакчы чоннуң болгаш ажылдакчыларның хей-аъдын көзүлдүр-ле көдүрүп, сагыш-сеткилин өөртүпкенин кожууннуң төп эмнелгезиниң кол эмчизи Эрес Куулар демдеглээн.
"Ырак черде объектилерниң тудуунче материалдар чедирип алыры болгаш специалистерни хаара тудуп алыры берге болган. Ындыг-даа болза чурттакчыларга эмчи дузазын алыр таарымчалыг байдалдарны тургузуп бээри специалистерниң хей-аъдын көдүрүпкен" — деп, кол эмчи онзалап демдеглээн.
Чаа фельдшер-акушер пунктузу Тожу кожуунда эмчи ачы-дузазының шынарын бедидеринге чугула базым болур.
Кадык камгалал яамызының медээзи болгаш чуруктары.
“Шын” №29 2025 чылдың июль 31
