Тыва Республиканың алдарлыг артизи Сайын-Хоо Намчылак “Узун назынның Буддазын” илередип турар хендирлерден кылган Амитаюс бурганның чуруун Тубтен Щедруб Линг хүрээзинге белекке берген. Ол ону Тибеттиң Лхасы хоорайның кыдыында Сера хүрээзинден эккелген.
Сера дээрге Тибетте эң улуг сарыг шажынчы хүрээлерниң, дээди өөредилге черлериниң, школаларының бирээзи. Ол аян-чоруктап өргүл кылыр черлерниң бирээзи болур. Ооң мурнунда Дрепунг, Ганден-биле кады Тибеттиң 3 күрүне хүрээзиниң бирээзи турган.
“Ноябрь айда Тибеттиң Лхасага бир концерт эрттирген мен. Ол чорааш, 4 хүрээге четкен мен. Оларның бирээзинге бо чурукту ап алырын сүмелээн. Ол дээрге бүгү-ле бурганнарга тураскааткан Амитаюстуң чуруу-дур. Мээң күзелим ону албан-биле бистиң чаа хүрээвис Тубтен Щедруб Лингиге эккээри болган” – деп, ыраажы Сайын-Хоо Намчылак чугаалаан.
Ламаларның чугаалап турары-биле алырга, Амитаюс бурганның чуруу медитациялаарынга болгаш номнал кылырынга кончуг ажыктыг. Ооң чуруун бүгү-ле сагыш-сеткилин, бодалдарын чырыткы чедеринче угландырып, медитацияны күштелдирер объект болуп турар.
Буян Ооржактың тырттырган чуруктары
