Тываныӊ Баштыӊы Владислав Ховалыг чаа социал албан черлериниӊ Кызыл хоорайда, Каа-Хем суурда тудугларын хынап чораан.
Тудугларныӊ берге айтырыгларынга хамаарыштыр ТР-ниӊ Тудуг яамызыныӊ удуртукчулары, подрядчик тудуг компаниязыныӊ төлээлери-биле «бут кырынга» хурал эрттирер ужурга таварышкан.
Хуралдыӊ киржикчилери Кызылдыӊ Кечил-оол, Бай-Хаак кудумчуларында, Спутник микрорайонда болгаш Каа-Хем суурда ̶ шупту дөрт тудугга четкен.
Бай-Хаак кудумчузунда школа тудуу адакталган, ажылдыӊ 70 хуузу кылдынган. Өске тудугларда ажыл чаа эгелээн, оларны 2024 чылда дужаар деп турар.
Республиканыӊ Баштыӊыныӊ чугаалааны-биле алырга, тудугжулар акшаландырыышкынныӊ хемчээлиниӊ, ол объектилерни электри четкизинге, чылыг хандырылгазыныӊ инфраструктуразынга кожар технологиялар дугайында айтырып турар. Берге айтырыгларныӊ чамдыызын аӊаа хурал үезинде шиитпирлээн. Бо ажылга тус черниӊ кадрларын болур-чогуур хемчээли-биле хаара тудуп, киириштирбейн турарынга хамаарыштыр Владислав Ховалыг бодунуӊ талазындан подрядчиктерге хомудалды илереткен.
Тываныӊ Баштыӊы школалардан аӊгыда, найысылалдыӊ Спутник микрорайонунда Культура сайзырадыр төптүӊ тудуун хынаан. Ону КХН «Сельстрой» кылып турар. Чаа культура төвү «Саян» ыры болгаш танцы-сам ансамблиниӊ бажыӊы болур дээрзин Владислав Ховалыг социал четкиде арнынга бижээн.
Бо объект колдуунда белен, ону май айныӊ эгезинде ажыглалга киирерин планнап турган. Ынчалза-даа тудуг материалдарыныӊ өртээ өзе бээрге, акша-хөреӊги чедишпейн барган. Ынчангаш керээниӊ негелдезин өскертип, объектини ажыглага киирер хуусаазын соңгаарлаткан. Немей акшаландырыышкын дугайында айтырыг амгы үеде шиитпирлеттине берген, тудуг ажылдары уламчылап турар.
Р. ДЕМЧИК белеткээн.
