Эрткен чылдың июнь айның эгезинде Бии-Хем кожууннуң төвү Туран хоорайга «Чурттаар оран-сава болгаш хоорай хүрээлеңи» национал төлевилелде кирип турар «Таарымчалыг хоорай хүрээлеңин тургузары» деп федералдыг төлевилел-биле көжүп келген баштайгы орус чонга тураскааткан парк ажыдыышкыны болган. Бо үе дургузунда ол парк туранчыларның эң-не ынак дыштаныр чери апарган. Туран хоорайда организастап турар шупту культура-массалыг хемчеглер ол паркта эртип турар.
Туранның онзагай төөгүзүнүң кадагалакчыларының эгелекчи саналы-биле бо төлевилел тургустунган. Төлевилел биче хоорайларга болгаш төөгүлүг суурларга таарымчалыг хоорай хүрээлеңин хевирлээр эң-не дээре төлевилелдерниң Бүгү-российжи мөөрейиниң тиилекчизи болган.
Бии-Хем кожууннуң чагырга даргазының оралакчызы Роман Васильевтиң чугаазы-биле алырга, төлевилелди тургузарынга хоорайның шупту школалары, уруглар садтары болгаш хөй-ниити организациялары киришкен, а киржир чагыгны чагырга чери киирген.
«Паркты долгандыр видео болгаш фото-чурук бижидер 32 камераны тургускан. Тудуг ажылдарынга ниитизи-биле 76 ажыг сая рубльди үндүрген. Шак-ла мындыг федералдыг программалар кижилерниң амыдыралының деңнелин экижидип, улуг-биче чонга өөрүшкүнү сөңнээр-дир» — деп, Роман Васильев чугаалаан.
Паркта янзы-бүрү хемчеглер эрттирер концерт сценазын, садыгжыгаштар, дыштаныр болгаш оюн-тоглаа организастаар шөлчүгештер, элээдилерге скейтпаркты тургускан. Ол ышкаш массалыг хемчеглер организастаар улуг шөлдү база ында кылган. Чоокта чаа
туранчылар аңаа Чаа чыл болгаш Шагааны байырлааннар.
Хөй-ниити чыглыр бо паркты Туран хоорайның 138 чылдаанынга тураскаадып ажыткан. Парк республикаже көжүп келген баштайгы орус чоннуң төөгүлүг салгалдарының символу болур ужурлуг деп, Тываның Баштыңы Владислав Ховалыг демдеглээн.
Парктың чаагайжыдылгазын хоорайның төөгүзүнге даянып, бир тускай аян-биле кылган. Ында орус чоннуң бажыңын база тыва өгнү, а мурнуу-чөөн чүк талазында Тываның төөгүзүнге ханы исти арттырган, Туранның үндезилекчизи Иннокентий Сафьяновка тураскаалды тургускан.
Чурттуң Президентизи Владимир Путинниң саналы-биле ажылдап кылган «Чурттаар оран-сава болгаш хоорай хүрээлеңи» национал төлевилелде кирип турар «Таарымчалыг хоорай хүрээлеңин тургузары» деп федералдыг төлевилел-биле паркты туткан.
А. СОЯН белеткээн.
Ада ТЮЛЮШТУҢ тырттырган чуруктары.
«Шын» №13 2024 чылдың февраль 21
