Российжи шериглер, оларның аразында тыва оолдар, Донбассты камгалаарынга боттарының бедик мергежилдиин, эрес-дидим, коргуш чок шиитпирлиг чоруун удаа-дараа бадыткап турарлар.
Бөлүк российжи шериглер украин националистерниң эжелелиниң адаанга турган бир чуртталга чериниң чоогунга тускай дайынчы даалгазын күүседип турганнар. оларның аразынга тыва шериг улуг сержант Максим Монгуш база турган. Арга-арыг чер-биле чоруп ора, улуг сержант Монгуш удурланыкчының быжыгланып, камгаланып алган черин (укрепрайон) база 30 хире кижиден тургустунган украин националистерниң чепсектиг бөлүүн илередип тыпкан.
Удурланыкчының арга-шинээн, күжүн база ооң шериглерни камгалап, чажырары-биле база боо-чепсекти эптиг кылдыр ажыглаар дээш тудуп, тургузуп алганы чүүлдерин хынамчалыг сайгарып көргеш, Максим ук черниң координаталарын штабче дарый дамчыдыпкан. Российжи артиллерияның шыгаагаш, чоруткан адыышкыннарының түңнелинде националистерлиг быжыгланып, камгаланган чер долузу-биле узуткаттынган.
Каш хонук эрткенде, улуг сержант Максим Монгуш салбыры-биле кады дайынчы даалгазын күүседип тургаш, радикалдарның эжелелиниң адаанга турган чуртталга черлериниң бирээзин хостаарынче угланган тулчуушкуннарга киришкен. Тулчуушкун үезинде Максим Монгуш балыгланган-даа болза, тулчуушкун шөлүн кагбайн, бодунга бирги эмчи дузазын боду чедиргеш, дайынчы хүлээлгезин күүседирин уламчылаан. Ук тулчуушкуннарның түңнелинде украин националистер улуг когаралга таваржып, чуртталга черинден үнүп чорупкан.
Шериг оолдарывыстың маадырлыг чоруу, албан-хүлээлгезинге бердингенинге чоргаарланмас аргавыс чок.
Бистиң корр.