Тываның Баштыңы Владислав Ховалыгның даалгазы болгаш Улусчу фронтунуң “Автопоезд” акциязы-биле Украинада болуп турар тускай шериг операциязында киржип турар Тываның шериглеринге чыгдынган автомашиналарны Москва облазының Перово хоорайда чедире берген. Ол дугайында Улусчу фронтунуң регионалдыг күүсекчи комитединиң удуртукчузу Саима Далчин дыңнаткан.
Ооң чугаалап турары-биле алырга, автомобильдерни бистиң шериглеривиске план ёзугаар чедирер.
“Амгы үеде машиналар Москва облазының Перово хоорайында турар. Чоокку үеде Ростов-на-Дону хоорайже шимчеп үнер. Бистиң делегациявыс май 3-те техниканы уткуур черже чорупкаш, май 8-те бистиң шериглеривиске чагыг ёзугаар техниканы байырлыг байдалга дамчыдып бээринге белеткээр” – деп, Саима Далчин чугаалаан.
Оон ыңай машина бүрүзү чагыг ёзугаар ээзинге чедерин ол демдеглээн. Кожууннар болгаш өргүл берикчилери боттары автомобильдерни кымнарга дамчыдарын тодаратканнар.
“Тодаргай адрес чок чагыгларны 55-ки, 74-кү, 11-ги бригадаларның командылалы-биле кады аңгы-аңгы шериг кезектеринде бистиң шериглеривисти хаара тудуптар кылдыр хувааган. Шупту техниканы керээ ёзугаар дамчыдар” – деп, Саима Далчин тайылбырлаан.
Чыжыргана СААЯ.
