Тускай шериг операциязының киржикчилери төлевир чокка хереглели улуг мергежилдерге өөренип азы немелде мергежил чедип ап болур. А ажыл берикчилери оларны ажылга тургусканы дээш, субсидия акшаны алыр. Ол дугайында доктаалга Михаил Мишустин атты салган.
Ол ышкаш ук шиитпир тускай шериг операцияларынга киржип тургаш, амы-тынындан чарылган шериглерниң өг-бүлелериниң кежигүннеринге база хамааржыр.
Үстүнде айыттынган хамаатыларга өөредилгени дараазында өөредилге черлери организастап турар:
*Профессионал өөредилге хөгжүдер институт;
*Россияның улусчу ажыл-агый болгаш күрүне албанының академиязы;
*Томскунуң күрүне университеди.
Өөренир дугайында чагыгларны “Россияда ажыл” порталынга киирер. Өөредилге черлериниң чарыгдалдарын чазак грантылар дузазы-биле тургузуп бээр.
Ындыг хамаатыларны ажылга тургусканы дээш, ажыл берикчилеринге бээр субсидияның түңү район коэффициентизинге көвүдеткен 3 ажыл төлевириниң кудуку деңнелинге, камгаладылга дадывырынга болгаш ажылга тургускан кижилерниң санынга көвүдеткенинге дең.
Ажыл берикчизи бир дугаар төлевирни ажыл дилеп келген кижини ажылга тургускан соонда бир ай эрткенде алыр. А ийи дугаарын 3 ай болгаш, а үшкүзүн 6 ай болгаш алыр.
Ажыл берикчизи күрүне деткимчезин алырда:
1) Бодунда бар ажылчын олуттарга тааржыр специалистерни шилип алыры-биле чонну ажылга хаара тудар төпче баар. Ону “Россияда ажыл” порталында бодунуң хууда кабинедин таварыштыр ырактан кылып болур.
2) Субсидияның хуваалдазын болгаш төлевирин харыылап турар Социал фондуже билдириишкин киирер. “Социал камгаладылга” системазын таварыштыр ырактан документилерни чорудар арга база көрдүнген.
Ук ажылды “Ажылче хаара тударын демнежири” федералдыг төлевилелге кызыгаарланып чорудуп турар.
Тускай шериг операциязының киржикчилерин эде өөредир болгаш ажылга хаара тудар дугайында айтырыгны парламентиниң адакы палатазынга чазактың чылдың болур отчёдунуң соонда Михаил Мишустинниң Күрүне Думазының депутаттары-биле ужуражылгазының үезинде чугаалашкан.