Өөредилгеге тускай сорулгалыг чыылданың баазазы “Россияда ажыл” порталда көстүп келген. Өөредилге үезинде карактап, доозуптарга оларны ажыл-биле хандырар ажыл берикчилериниң чугула саналдары-биле келир үениң сургуулдары таныжып болурлар.
Сонуургалдыг бүгү-ле ажыл берикчилеринден санал-оналдарны июнь 10-га чедир порталга киирген, аскан турар ужурлуг.
Тываның Чонну ажылга хаара тудар төптүң дыңнатканы-биле алырга, май 30-ге чедир специалистерни тускай сорулгалыг белеткээринге республиканың 11 ажыл берикчизинден 29 чагыг кирген. Ол дээрге тус черниң чагыргалары, школалар, немелде болгаш школа назыны четпээн уругларның албан черлери, Тываның күрүне университеди, Арыг-шеверниң болгаш эпидемиологияның Тыва Республикада төвү, Росхереглелхайгаарал эргелели, Кадык камгалалының, Чурагайлыг хөгжүлдениң, Арга-арыг ажыл-агыйының болгаш бойдус курлавырларының яамылары, Ветеринария албаны, Национал хөгжүм-шии театры-дыр.
Эртемнер аайы-биле башкылар, бухгалтерлер, арга даамалдары, эмчи специалистери, актёрлар болгаш өске-даа специалистер хереглеттинип турар хостуг ажылдарже шупту 167 чагыг кирген.
Тускай сорулгалыг өөредилгениң баазазы-биле https://clck.ru/3AWmni айтылганы таварыштыр таныжып, аңаа бодунуң оналын арттырып каап болур.
Тускай сорулгалыг өөредилгеде колледжиже азы дээди өөредилге черинче дужаап кирип турар абитуриент ажыл берикчизи-биле керээни чарар. Аңаа дүүштүр олар халас эртемни алырлар, а өөредилгени доозупканда ук ажыл берикчизи ажылга тургузар. Кол негелде – ук организацияга специалист үштен беш чыл чедир ажылдаар ужурлуг.
Бистиң корр.
«Шын» №41 2024 чылдың июнь 5
![](https://shyn.ru/media/cache/2024/06/05/sfjwxzgjyny-0ab51316f7.jpg)