Сентябрь 22-де Тываның күрүне үниверситединге 62 дугаар аныяк эртемденнер болгаш студентилерниң археология-этнографтыг конференциязының байырлыг ажыдыышкыны болган. Аңаа ТР-ниң Чазак Даргазының оралакчызы Елена Хардикова, ТР-ниң Эртем талазы-биле агентилелдиң директору Алена Стороженко, ТР-ниң Национал музейниң директору Каадыр-оол Бичелдей болгаш ТывКУ-нуң эртем талазы-биле проректору Евгений Монгуш конференция киржикчилеринге байыр чедирип, сөс ап киришкеннер.
Конференцияның офлайн болгаш онлайн илеткелчилериниң аразында Красноясрк, Санкт-Петербург, Москва, Бишкектен билдингир эртемденнер - төөгү эртемнериниң доктору, СФУ-нуң профессору Николай Дроздов, т.э.к., Чөөн Европаның болгаш Сибирьниң Эрмитажта археология килдизиниң улуг эртем ажылакчызы Константин Чугунов биле т.э.к., Эрмитажта Чөөн чүк килдизиниң эртем ажылдакчызы Наталья Сутягина, б.э.к., Ломоносов аттыг күрүне университединиң Антропология Музейиниң болгаш ЭШИ-ниң улуг эртем ажылдакчызы, антрополог, археологДенис Пежемский, Кыргыз-Түрк “Манас” университединиң ректору, т.э.д, профессор Алпаслан Джейлан болгаш өскелер-даа киришкен.
“Бөгүнгү конференцияны, чүнүң-даа мурнунда, Тываның археологиязынга тураскааткан. Бистиң республикавыс археологтуг Мекка апарган. Бисте дыка хөй казыышкыннар чоруттунуп турар. Чижээ, чоокта чаа “Чиңге-Тей-1” базырыкты чугаалаарга-ла чедер. Ынчангаш республикавыстың этнографиязын, археологиязын ханы өөренири аныяк эртемденнерге, студентилерге чугула. Бо конференцияның ажылының үезинде билдингир эртемденнерниң лекцияларын дыңнап алыры дыка ажыктыг”- деп, ТывКУ-нуң проректору, филология эртемнериниң кандидады Евгений Монгуш чугаалаан. Ол ышкаш ТывКУ Тываның археологтуг экспедициязының удуртукчузу Марина Килуновская-биле сырый харылзаалыг ажылды чорудуп, республикада археологияның сайзыралынга үлүг-хуузун киириштирип турарын демдеглээн.
Конференцияның ажыл планында аңгы-аңгы секциялар аайы-биле методиктиг семинарлардан аңгыда, Бии-Хемде Хааннар шынаазынче экскурсия база кирип турар.
Шак бо улуг хемчээлдиг конференция-биле Тывага археологтуг сезонну доозар. А бо сезон анаа эвес сезон болган дээрзин шупту билир. Чүл дээрге, “Чаа-Суг” базырыын шинчилээнинден аңгыда “Чиңге-Тей-1” базырыктан кайгамчыг тывыштарны эртемденнер казып тыпкан.
Сорунза Монгуш
Буян Ооржактың тырттырган чуруктары
