Биче хоорайларга болгаш төөгүлүг чурттакчылыг черлерге таарымчалыг хүрээлелди тургузарынга чарлаан Бүгү-российжи IX мөөрейге Тываның киирген үш төлевилели шупту тиилекчи болган. Оларны 2025 чылда боттандырып эгелээр, ону федералдыг бюджеттен акшаландырар.
103,1 сая рубль грант акшазын «Тыва кавай» деп төлевилелге тускайлап бээр. Бо төлевилел ёзугаар Кызыл хоорайның национал парыгының девискээрин чаагайжыдар. Парктың төп шөлүнге хөй хевирлерниң павильонун, спорт болгаш хөгжүм шөлчүгештерин тудар.
70,8 сая рубльди Шагаан-Арыг биле Туран хоорайларның Дружба биле Кочетов кудумчуларының чаартылгазын уламчылаарынга бээр. Бо хоорайлар мурнуку чылдарда база биче хоорайларның болгаш 20 муң чедир санныг чурттакчылыг черлерниң чаагайжыдылгазынга РФ-тиң Тудуг яамызының чарлааны мөөрейлерге тиилеп турганнар. Ол тиилелгелерниң грант акшазы-биле Тывага көжүп келген баштайгы орус чоннуң парыгын Туран хоорайга, Көшкүн чоннарның парыгын Шагаан-Арыгга туткан.
Таарымчалыг хүрээлелди тургузарынга федералдыг грантыларны 2024 чылда Чадаана биле Ак-Довурак хоорайлар алган. Чадаанада төлевилелдиң ады «Тос кожуун төвү». Бо төлевилелдиң грант акшазы-биле Тываның садыг, культура болгаш политиктиг төвү деп санадып чораан Чадаананың төөгүзүн архитектурлуг хевирге тудуп көргүзер.
Ак-Довурак хоорайда «Ак тоожулал» деп дыштанылга девискээрин тудуп турар. Ону архитектурлуг хевирлер-биле каастаар база аңаа спортчу шөлдү тудар.
А. МОНГУШ.
Чурукту интернет четкизинден алган.
“Шын” №75 2024 чылдың октябрь 2
