Төрээн дылым – мээң дылым
Орус, моол, алтай болгаш
Оон-даа өске дылдар-биле
Төрелдежип хөгжүп орар
Төрээн дылым – мээң дылым.
Тыва чонум турбаан болза,
Алыс бодум кайыын кээр мен?
Тыва дылым турбаан болза,
Аксы сөзүм кайыын кээр деп?
Өөрүшкүнү, муңгаралды,
Өгбелерим чагыгларын
Өзээн өттүр чугаалап бээр
Өндүр дылым – мээң дылым.
Өжээтенге каргыш салыр,
Өөрүмге йөрээл тудар,
Өршээл дилеп, Бурган алгаар
Өткүт сөстүг мээң дылым.
Үлегер сөс, ыры-шоорнуң
Үнер дөзү, чаяакчызы,
Чиге тода хуулгаазын
Чидиг чепсээм – мээң дылым.
Тыныш-биле тыным тудуш,
Дылым-биле бодум тудуш.
Ынчангаштың "Тыва мен" –деп
Ырлап чор мен, тейлеп чор мен.
Чооду КАРА-КҮСКЕ.
* * *
Утпа, оглум
Бурун шагдан, өгбелерден орук изээн
Буян бүргээн чараш тыва дылывысты,
Өгбелерниң чагыг сөзүн хажытпайн,
Өзүп орар салгалыңга дамчыт, оглум.
Угаадыглыг чечен-мерген эргим дылды
Улуг өндүр чогаалдардан өөренип ап,
Уттундурбас эң-не ынак тыва дылың
Утпа, оглум, чаштарыңга өөредип чор.
Төрээн дылың төөгүңнүң төөгүзү-дүр,
Төрел чонуң, төрээн чериң буяны-дыр.
Энең ышкаш Тыва дылың тының ол-дур,
Эртер орууң өгбең дылы баштап чорзун.
Алефтина АДЫШАА.
* * *
Өндүр өнчүм
Төрээн дылым, тыва дылым
Төк кээп дүшкеш, “ыңаа” диген,
Өгбелерден салгап алган
Өшпес одум, өгде өнчүм.
Дылы, Чери, Ие чокта
Тыва чонум турар деп бе?
Каргыраавыс, хөөмейивис
Каптагайга диңмирээр бе?
Ынчангаштың Тыва дылым –
Ынакшылым, чоргааралым,
Өгбелерим арттырып каан
Өртээ турбас өндүр өнчүм.
Екатерина СААЯ.
“Шын” №42 2025 чылдың октябрь 30