Май 20–21 хүннеринде «Сүбедей» спорт өргээзинде «Тыва экспо – 2022» делгелгениң ажыдыышкыны болган. Аңаа Кемерово, Абакан, Черногорск, Иркутск, Новосибирск дээн ышкаш улуг хоорайлардан келген сайгарлыкчылар барааннарын делгээн. Чүгле ырактан келген аалчылар эвес, а Тываның бүдүрүкчүлери база ажыктыг болгаш онзагай кылыгларын эккеп салып, хемчегге киришкен.
«Сүбедей» спорт өргээзиниң иштин база ооң девискээрин янзы-бүрү бараан-сараанын делгээн сайгарлыкчылар болгаш бүдүрүкчүлер долдур ээлепкен. Оларның аразында аъш-чем, эт-сеп, идик-хеп, чараштаныр херекселдер, суй белектер кылып турар улус бар. Кандыг-даа ховар бараанны оон тып ап болур арга бар.
Карак шокараңнаар хөй бараанның аразындан алгы-кежин аайлап, салып турган Каадыр Кырлыг-Кара бодунуң ажылын таныштырды.
– Даргавыс Маадыр Кырлыг-Кара. Алышкылар улус бис. 2011 чылда алгы-кеш эттээр цехти ажыдып алдывыс. Электри чырыы, алгы-кешти чымчадыр тускай бүдүмелдер дээн ышкаш чарыгдалдарывыс бар. Ынчалза-даа амыдыралывыска чедер акшаны ажылдап алыр-дыр бис. Бүдүрүлгеде таңныылывыс-биле кады беш кижи ажылдап турар бис. Алгыны чиик өртекке садып алгаш, болбаазыраткаш, садып-саарып турарывыс бо. Кыштаг, чайлагларже алгы-кеш чыып алыр дээш үнүүшкүннерни кылгаш, малчыннардан туда акша-биле садып алыр-дыр бис. Эң-не эки алгының өртээ 80 рубль болур. Кештиң шынарын көрүп тургаш, садар өртээн тодарадыр бис. Садып алыкчыларывыс республиканың кайы-даа булуңнарындан кээп турар.
Денис Гоффберг, Черногорск хоорайда «Колизей» тууйбу заводунуң чиңгине директору:
– Бо делгелгеге шагда-ла бир катап келген бис. Ам ийи дугаар кээп турарывыс бо. Тууйбунуң аңгы-аңгы хевирлерин бүдүрүп эгеледивис. Кижи кылаштаар оруктарга чадар тууйбуларывыс өскелерден ылгалдыг, даштын гранит-биле кылайтыр чаап каан. Рынокта 9 чыл ажа бердивис. Ол хире үе дургузунда дуржулгавыс шору апарган. Бистен үргүлчү бараан алыр садып алыкчыларывыс бар. Чаа садып алыкчылар база хүнден хүнче көвүдеп орарын эскергеш, өөрүвес аргавыс чок. Бо делгелгеге бүдүрүлгевистиң географиязын калбартып, бараанывысты көргүзер сорулгалыг келгенивис бо.
Айдың ОНДАР.
Алтынай СААЯНЫҢ тырттырган чуруктары.
