ТАР-ның ССРЭ-ге каттышканының юбилейлиг байырлалынга киржип келген Хакас Республиканың Баштыңы Валентин Коноваловка Тываның Баштыңы Владислав Ховалыг ужурашкаш, ийи регионнуң аразында социал-экономиктиг болгаш культурлуг кады ажылдажылганы улам быжыглаарын сайгарып чугаалашкан.
Кожа регионнарга эргежок чугула инфраструктурлуг төлевилелдерни демнежип боттандырары ажыл-агыйжы ужуражыышкынның кол айтырыы болган. Ак-Довурак – Абаза аразында автомобиль оруунуң чаартылгазынче кичээнгейни угландырганнар. Россияның Президентизи Владимир Путин Тывага чоокта чаа кээп чорда, Владислав Ховалыг бо орукта байдалы эң багай участоктарның септелгезиниң, аңаа 7,7 млрд рубль акша херек дугайында чугаалаан. Чурттар аразы ужур-дузалыг апаар бо орукту чаартырынга федералдыг төптен деткимчени Владимир Владимирович аазаан. Тыва биле Хакасияның удуртукчулары чугула инфраструктурлуг бо төлевилелди демнежип боттандырарын дугуржуп, Моол биле Россияның кызыгаарында «Хандагайты» эрттирилге пунктузу долузу-биле ажыглалга кире бээрге, Абаза– Ак-Довурак – Хандагайты автоорукту федералдыг эрге-байдалдыг кылдыр көдүрериниң аргазы тыптып кээрин демдеглээннер.
2024 чылда Санкт-Петербург хоорайга чурттар аразында экономиктиг шуулганга регионнар аразынга кады ажылдажылга дугайында чарган дугуржулганы боттандырарының айтырыгларын база сайгарып чугаалажып, Красноярск край– Хакасия – Тыва таварыштыр демир-орук инфраструктуразын хөгжүдеринге кады ажылдажылганың чугулазын айытканнар.
2028 чылда чурттар аразында «Азияның уруглары» IХ спортчу оюннарны эрттирери-биле холбаштыр ийи регионнуң чоннарының национал оюннарының маргылдааларын эрттирериниң планын тургузарын база дугурушканнар.
Тыва биле Хакасияның удуртукчулары ийи регионнуң аразынга харылзааларны болгаш кады ажылдажылганы янзы-бүрү угланыышкыннарга чедиишкинниг хөгжүдүп болурунуң бүгү аргалары бар дээрзин демдеглээннер.
ТАР-ның ССРЭ-ге каттышканының юбилейлиг байырлалынга киржип келгени дээш Хакас Республиканың Баштыңы Валентин Коноваловка Тываның Баштыңы Владислав Ховалыг улуу-биле өөрүп четтиргенин илереткен.
Хакасияда тываларның саны сөөлгү чылдарда элээн көвүдээн. Сан талазы-биле тыва диаспора үшкү черде. Тывалар Хакасияның хөй национал чурттакчы чону-биле эп-найыралдыг чурттап, ажылдап, регионнуң хөй-ниити амыдыралынга идепкейлиг киржип турар.
Ш. МОҢГУШ белеткээн.
«Шын» №78 2024 чылдың октябрь 12
