Кызылдың Спутник микрорайонунда чаа туттунган культура одаанга «Аңгыр-оолдуң тоожузу» деп чаа, тыва кинонуң бирги көрүлдези болур деп чарлал номчааш, амырап барып көрдүвүс.
Тыва кино режиссёрларының үндүрген кинозун улуг сонуургал-биле көргеш, өөрүшкүмнү илередип бижикседим. Тываларның шаандагы амыдыралын, езу-чаңчылдарын көргүскени солун-дур, ылаңгыя аныяк-өскенге өөредиглиг-дир. Сонуургак Аңгыр-оолдуң ролюн күүсеткен элээди оолдуң ойнап каанын көргеш, магадап ханмадым. Школачы бичии оол артистер ышкаш ойнап каан. Иезин чидиргеш, Аңгыр-оолдуң муңгарап ыглап турарын көргеш, ыглажып-даа олурдувус. Кырган-авазының ролюн күүсеткен артист шыырак-ла ойнаан-дыр.
Школачы тургаш, Степан Сарыг-оол чогаалчының «Аңгыр-оолдуң тоожузу» деп номун номчуп турганымны сактып турдум. Дыка-ла сонуургап номчаан мен. Ол үениң школачылары номчуттунарынга ынак турган болгай. Кижиниң номчаан чүүлү олчаан уттундурбас артып каар. Сактырым, Шагааны канчаар эрттирип турганын аажок сонуургап номчуп турган мен. Кинозунга база Шагаалап турганын көргүскен болза, оон-даа солун ийик. Кинону тырттырып турганының дугайында «Шын» солунга бижип каанында, чаңгыс чай дургузунда тырттырган ышкаш болду. Кыска үе дургузунда тырттырган кино ындыг ыйнаан, кышкы үези чок.
Кинону көргеш, школачыларга, аныяктарга бо кинону көргүзер болза, эки-дир деп бодап олурдум. Башкылар бүдүн клазын эдертип алгаш-даа болза, чоп көргүзүп болбас деп. Шак-ла мындыг тыва амыдыралды, езу-чаңчылдарны көргүскен кинолардан, мультфильмнерден ам-даа көвүдедир үндүрер болза эки-дир.
Анчымаа МОНГУШ.
Кызыл хоорай.
“Шын” №97 2024 чылдың декабрь 18