Август 14-те “Азияның төвү” тураскаалдар комплекизинге болган тус черниң бараан бүдүрүкчүлериниң l-ги республика чергелиг "Ус- куш" делгелге-ярмарказының киржикчизи Кызыл хоорайның чурттакчызы Херел Очур-оолович Ооржак. Ол тыва национал эдилелдерни, ойнаарактарны чазааш, уттундуруп бар чыдар чиңгине тыва угулзалар-биле каастап, чуруп турар.Делгелгеге ооң салган ажылдары хөйнүң кичээнгейин хаара туткан.
- Школадан тура чуруп эгелээн мен. Кызылдың уран чүүл училищезиниң (колледжиниң) чурулга салбырын дооскаш, ол-ла мергежилим аайы-биле амгы үеде Алдан-Маадыр аттыг Национал музейде реставраторлап ажылдап турар мен. Хостуг үемде бажыңымга чазап, чураан ажылдарымны аңгы-аңгы делгелгелерге салып, шаңналдыг черлерни-даа ап турдум. Бо удаада, кылган ажылдарымның артканын мында салганым ол. Орус улустуң матрёшкалар дээр ойнаарагынга дөмейлештир кылган ажылымда авам, ачам болгаш бодумнуң өг-бүлемни чуруп көргүскеш, ачамны чураан матрёшка иштинче чеди кижи кире бээр кылдыр чазап кылганым ол. Улустуң сонуургаары кончуг чүве-дир. Чагыглар база кээп турар. Деспини бир кижи дораан алыр мен диди. Кылган ажылдарымны колдуунда улус дораан алгаш баар боор чорду. Мындыг делгелге-ярмаркалар удаа-дараа болуп турар чүве болза, дыка-ла ажыктыг ийин. Чаңгыс харааданчыг чүүл, бо-ла эскерип чоруурумга, чиңгине тыва угулзалар чуруп турар улус ховартап турар-дыр.
К.Монгуш
Чуруктар авторнуу
#Ус_кушделгелге
#тусчерниңбараанбүдүрүкчүлери
